Чынжымак, кызыт почто ял калыклан кугунак полшен шога. Еҥ-влак тышке илыме верлан квитанций почеш тӱлаш гына огыл толыт, почтальон-влаклан сатумат нумалаш логалеш. Банк картым тыштак почыт, маркетплейс гыч заказым пуэдат.
Токтарсола почто школ воктене верланен. Тушто вуйлатышылан Татьяна Фёдоровна Кузнецова кумшо ий тырша. Тудо Моско кундемыш 12 ий кудалыштын, стройкышто пашам ыштен.
Кум почтальон уло. Коктынжо почтышто ыльыч, «Любовь Евгеньевна Токтарова отпускышто» маньыч. Тамара Семёновна Иванова ондак школышто математике ден физикым туныктен. Кандаш ий ончыч пенсийыш лектын да почтышто вер лекмеке тыршаш тӱҥалын. Токтарсола ден Чевермучаш яллашке йолынат коштеш, кеҥежым гын велосипедым кушкыж шинчеш. Параньга кундемысе Олор ял гыч туныктышо тукымыш марлан толын. Авалийшыже химий ден биологийым туныктен, ынде шкенжынат ӱдыржӧ – нине предметла денак туныктышо.
Фаина Фёдоровна Протасова повар-кондитерлан тунем лектын, а ӱмыржӧ мучко почтальонлан пашам ышта, 1988 ий годсекак. Ешыж дене Пактек ялыште ила. Пелашыже Моско кундемыш кудалыштеш. Кум йочам ончен куштымылан кӧра тений ондакрак пенсийыш лекшаш. Пактекыш, Макматыш, Изи да Кугу Кемсолаш (кызыт нуно Токтарсолан уремжылан шотлалтыт) коштеш. Куд уныкан кова улам, мане.
– Кызыт газет-журнал шагалрак, сандене утларакше сатум нумалына. Телым пакетыш оптена, кид денак наҥгаена. Ондак пасу гоч вик ече денат коштынам. Кеҥежым велосипед полша. Чумыр корнем 20 наре меҥгышкат шуэш, тидыже молын деч шукырак. Арнялан кум кече пашаште улына, вет кызыт 0,7 ставкына веле, – ойла опытан почтальонко.
Ты кундемыште «Кугарня» газетлан подпискым 21 еҥ ыштен. Тӱҥ шотышто льгото дене выписатлат.