Кажне икшыве у тунемме идалыклан чон вургыжын ямдылалтеш. Тудлан у дневник, рюкзак, формо да молат кӱлыт. Садлан йочам школыш погаш ачаава-шамычлан шагал огыл шийвундым луктын пыштыман. Таче тунемшым школыш колташ мош шуэш?
СПИСКЕ КУШТЫЛЕМДА
Икымше классыш кайыше ньогалан мо кӱлешым наледаш школлаште ончылгоч спискым ямдылат. Тушто икшывын капкылжылан келшыше ранец гыч тӱҥалын вургем йотке возат. Тидыже, мутат уке, кугыеҥ-влакым уто шонымаш деч утара. Но спискын кужытшым икымше гана ужмеке, вуетат савырнен кертеш. Ты списке деч такшым утыжым лӱдман огыл. Тушто кажне арвер шке радамже почеш возалтын, садлан чот кугула чучеш. Мутлан, канцеляр сату тӱшкаште дневникым, тетрадьым, книгалан комым, тӱрлӧ тӱсан да тыглай карандашым, точилкым, ручкам, пеналым налаш кӱлмӧ нерген палемдат.
Теве технологий уроклан папкыш мом оптыман, посна тӱшкаште ончыктат. Тудын почеш альбомым, гуашьым, чиян картоным да кагазым, кистычкым, клейым, ош картоным да кагазым, вашкӱзым, пластилиным да тудлан арверым, кистычкым нӧрташ атым наледыман.
Ӱдыр ден эрге икшывылан школыш чияш могай вургем кӱлеш, посна ончыктат. Но школ формо икгай тӱсан да фасонан лийшаш. Тылеч посна кажне школын – шке шевронжо. Тудым жилетын але сарафанын оҥышкыжо пижыктат. Физкультур урокланат мом наледыман – возат.
Тыгай списке почеш икшывым школыш погаш, чынжымак, моткоч йӧнан. Но тудым йочам икымше классыш колтымо годым веле пуат. Кугурак классласе ӱдыр-рвезешамычлан ача-ава-шамыч йодмо почеш наледат.
КУШТО? МЫНЯРЕ?
Рӱдӧ пазарыште ортопедический ранец 2500-3500 теҥгеш шуэш. Тыгайым утларакше тӱҥалтыш класслаште тунемше икшыве-влаклан наледат. Кугурак класслаште тунемше ӱдыр-рвезевлаклан рюкзакым 1500-2000 теҥгелан муаш лиеш. Дневникын акше – 180 гыч 300 теҥге марте. Пеналлан ак, конешне, ӧрыктара. Кок лончан пенал – 500-600 теҥге, кум лончан – 800-1000 теҥге. Шоналташ гын, рюкзак деч изишак веле шулдырак. Тетрадьлан ак тӱрлӧ. Темлыме фирмын лӱмжӧ деч шуко шога: икте 12 лаштыкан тетрадьшым 10-15 теҥгелан ужала гын, весын 18-25 теҥгеш шуэш.
Тыште тунемшын икымше верыште улшо канцеляр сатужлан веле акым палемдыме. Тылеч посна списке почеш эше шуко мом наледыман. Кокла шот дене ачаава ик учениклан ранец дене пырля 10 тӱжем теҥгем луктын пышта.
САРАФАН, БЛУЗКО, ТУФЛЬО…
Кеч-могай ача-ава вургемым наледыме годым качествылан тӱткышым ышта. Вет йочалан формым школыш идалык мучко чийыман. Садлан тыгай вургемын акше шулдо лийын огеш керт.
Ӱдыр икшывылан, мутлан, сарафан 2500-3500 теҥгеш лектеш. Тыгак блузко (1500- 2000 теҥге), тӱрлӧ колготко (ошо, шеме, пелганде – 1500 теҥге), туфльо (2000 теҥге), классыште чияш йолчием (1500-1800 теҥге), кроссовко (1500-1700 теҥге), жилетке (1200-1500 теҥге), физкультурлан формо (2000 теҥге), бант (мужыржо – 500 теҥге) кӱлыт. Тылеч посна ешартыш вургемым: йолашым, жакетым, юбкым – наледыман. Нунынат – шке акышт.
Рвезе икшывылан шагалрак вургем кӱлмыла чучеш, но нунымат тыгак чиктыман. Йолашын, жакетын, тувырын, йолчиемын акышт нимынярат шулдын огыт шу. Шийвундым ик семынак луктын пыштыман.