Морко район Унчо села гыч Ольга Сидорова чыла шӧрыныштат чолгалыкшым ончыкта. Тудо 9-ше классыште тунемеш, спорт дене заниматла, шымлыме пашам эртара, волонтёр сомылым шукта.
Кочаже – сай пример
Ольга ешыжым моткоч акла, йӧрата, аважлан полшаш эре тырша.
– Ешыште кум ӱдыр улына, мый – кыдалашыже. Вич ияшем годым неле черлан кӧра ачамын илышыже кӱрылтын. Авам Татьяна Алексеевналан шуко нелылыкым чытен лекташыже логалын. Тудо Унчо кыдалаш школышто директорын воспитатлыме паша шотышто алмаштышыже, тыгак туныктышо-логопед.
Кочам Алексей Кугергинович Фёдоров мыланна эреак полшен шога. Тудо чын пӧръеҥ, патриот, пашаче айдеме. «Передовик» колхозышто шофёрлан 44 ий пашам ыштен. Вийжым, тазалыкшым чаманен огыл. Пашам йӧратен ыштымыжым ятыр награде пеҥгыдемдат. Кочам – Марий Эл Республикысе ялозанлыкын сулло пашаеҥже. Кызыт сулен налме канышыште гынат шофёр пашаж деч кораҥын огыл. Уныкаже-влакым «Пашаште – вий, пашаште – куан. Илыш – тиде паша, а паша – тиде илыш» манын туныкта. Мый кочам дене моткоч кугешнем. Сандене тенийысе «Ший талешке» шымлымаш конференцийыш марий йылме ден литературым туныктышем Римма Николаевна Петрован полшымыж дене кочаем нерген материалым ямдыленам да 15-18 ияш-влак коклаште «Талешке мемнан коклаште» номинацийыште икымше верым налынам, – каласкала Оля.
Чолга ӱдыр
О.Сидорова тунемме деч посна тÿрлö мероприятийыште, конкурсышто, таҥасымаште шке вийжым терга.
– Кок ий почела школьник-влаклан эртаралтше Йӱдвел-эрвел олимпиадыш (олимпиаде тӱрлӧ предмет дене, тыгак уш-акылым тергыме спортын видше-влак: шахмат, шашке, го – дене эрта; шочмо йылме да филологий профильла дене тыгай олимпиаде Российысе вузлаш тунемаш пурымо годым льготым пуа – авт.) ушненам. Тений тушто 90 утла баллым погенам. Усталык конкурслаш сÿретым, фото-влакым, поделкым ыштыл колтедем. Тений «Ворошиловский стрелок», «Зарница» районысо таҥасымашлаште участвоватленам. 9 майыште «Сеҥымаш корно» марафонышто 15 меҥгым куржынам.
Тылеч посна ӱдыр школ пеленысе «Порылык» волонтёр отрядыште шога. Тудо Унчо школ пелен 2024 ий октябрь годсек пашам ышта.
– Отрядна ÿмаште Янык памаш воктенысе оралтым чиялтыш, окоп сортам ышташ манын, ынде кок шыже пÿгыльмым погенна, СВО участник-влакын аваштым Ава кече, 8 Март дене саламлена, У ийлан сулен налме канышыште улшо туныктышо-влакым саламлаш коштына, школышто эртаралтше мероприятийлаште полышкалена, – манеш О.Сидорова .
Ольга кӧ лийшашыжым эше ок пале. Сандене шкенжым чыла могырымат шуара, чыла аланыштат моштымашыжым терга.