Курск областьыште элнан тӱрлӧ регионжо гыч кажне кечын шӱдӧ утла волонтёр тырша. Специальный военный операций тӱҥалме дене ты кундемыш поро кумылан еҥ-шамыч чон йодмо почеш военный госпитальыш, пансионатыш, жаплан вераҥдыме пунктлашке полшаш толыт.
Эре ямде
Марий Элысе волонтёр-шамыч тушто 10 гыч 19 август марте лийыныт. Нуно #МЫВМЕСТЕ гумманитарный миссий (доброволец-влаклан келыштаралтше кугыжаныш программе, Российысе исторический да чек воктене верланыше регионлаште илыше-шамычлан полшаш ышталтын) кышкарыште тушко ушненыт. Волонтёр-шамыч Курск олаште тӱрлӧ задачым шукташ полшымаште тыршеныт: тусо чек кундем-влакым ӧкымеш шуэн коден каяш логалше-шамыч дене лийыныт, гуманитаркым приниматлымаште, ойыркалымаште да пуэдымаште тыршеныт, социальный да медицине тӧнежлаште пашам ыштеныт.
Марий Элысе волонтёр-шамыч #МЫВМЕСТЕ гуманитарный миссий почеш тушко икмыняр гана миен коштыныт. Ты паша регионысо добровольчестве системын ик тӱҥ сомылжылан шотлалтеш. Тудо мемнан волонтёрна-влакын кушто полыш кӱлеш – тушто лияш ямде улмыштым пеҥгыдемда.
Волонтёр-влак коклаште марий ӱдырамаш Галина Рублёва лийын. Тудо тыгерак каласкала:
– Мый гуманитарный миссий почеш Курскыш икымше гана миенам. Ик волонтёр-влак толкынышто тушко каяш кумылан-шамычым погымо шотышто увертарымашым ужынам да, «Добро.РФ» сайтыш пурен, йодмашым колтенам.
Марий Эл гыч тушко лу еҥ кайышаш улына ыле, но нылытын веле коштын толынна. Мыйым да эше ик волонтёрым госпиталь пеленысе кочмыверыште полшаш пеҥгыдемденыт. Тушто тӱрлӧ сомылым вораҥдаренна да моло шуктенна. Госпитальыште паша эреак лектын шоген, садлан яра шинчаш жап лийынат огыл, манаш лиеш. Ме 8 шагат эр гыч 8-9 шагат кас марте тушто тыршенна. Тыгак коляскыште шинчыше салтак-влаклан ик вер гыч вес верыш куснылаш, лифтыш пураш да лекташ полышкаленна.
Госпитальыш кечыгутышто сусыргышо салтак-влакым икмыняр гана машина дене кондат. Эмлызе да моло персоналлан физически чылажымат шукташ неле. Вет нунылан сусыргышо-шамычлан икымше полышым пуыман, документым оформитлыман да молымат ыштыман. Садлан волонтёр-влак тушто эреак кӱлыт.
Илыш эн шерге
Курскышто элнан тӱрлӧ кундемже гыч волонтёр-влак тыршат. Тушко кугыжаныш программе, добровольческий рӱдер, Калык фронт толкын да моло ушем гоч каят. Нуным ик шонымаш уша – поро кумыл. Тудым волонтёр-шамыч шке пашашт дене эреак пеҥгыдемдат. Теве землякна-шамыч Курскыш яра каен огытыл, пеленышт ик чемодан гуманитарный полышым наҥгаеныт.
– Курскыш тарваныме деч ончыч «Сердце матери» толкынын волонтёржо-шамыч дене тӱрлӧ сатум погенна. Тушко мийымеке, салтак-влаклан нуным пуэденна. Мемнам тушто пеш порын вашлийыныт.
Курск – кугу да пеш мотор ола. Йӧн лекме почеш ме тысе Патриот паркым, «Героям Северного фаса Курской дуги» мемориал комплексым ончал савырненна. Тушто моткоч кугу, чапле памятник уло, тыгак ятыр кызытсе военный техникым вераҥдыме. Памятник ончылно пеледышым пыштенна, тыныс илыш верч вуйым пыштыше салтак-шамычым шарналтенна, – ойла волонтёр.
Галина Рублёва – кундемнан почётан волонтёржо. Тудо специальный военный операций тӱҥалме почешак салтак-шамычлан тӱрлӧ семын полшаш тӱҥалын: маскироватлалтме сеткым пидеш, кочкыш да гигиене сатум, тӱрлӧ арверымат поген, сӧйыш колтеда. Садлан тудын шуктымо поро сомылжым ойленат пытараш огеш лий.
Курскыш миен толмо деч вара шканет мом палемденат, йодым тудын деч. Вашмут тыгерак йоҥгыш:
– Сусыргышо салтак-влак дене шинчаваш мутланымеке, шке илемыштым ӧкымеш коден каяш логалше-шамыч дене вашлиймеке, волонтёр-шамычын йӱдшӧ-кечыже тыршымыштым ужмеке, кажне кечын вуй ӱмбалне дрон ден ракетын чоҥештылмыштым колмеке, шканем шуко ум почынам. Ты тӱняште илыш деч шерге нимо укем эше ик гана пеҥгыдемденам. Шуко молан шинчаончалтышем вашталтын. Тушто кажне еҥын шке историйже: чоным савырыше, шинчавӱдым лукшо…
Тыгай илыш ситуацийыште волонтёр-шамычын тыршымыштым нимо дене аклаш огеш лий. Нунылан кугу чап! Тек кажне волонтёрын чон шокшыжо, поро кумылжо тудлан миллион пачаш тыгаяк порылык дене пӧртылеш.