Томат вондо пеҥгыде кушшо да саскаже тамле лийже манын, йыраҥыш кусарен шындыме годым икмыняр каҥашым шотыш налза.
Помидорлан йыраҥым шыжымак ямдылаш гын, сайрак: терысым але компостым ешарен кӱнчыман.
Шошым томат йыраҥым уэш пушкыдемдыман, тыгодым тушко ломыжым шавыман. Тыге мланде калий да моло микроэлемент дене пойдаралтеш, кислотностьым иземеш.
Кушкылым шындыме годым лакышкат ӱяҥдышым ешараш пайдале:
- компост да ломыж дене пырля шоган але чеснок шӱмым пыштыза. Тиде бактерий деч утлаш полша, нематодым да эҥгекым кондышо моло копшаҥгым лӱдыкта;
- лу ложаш фосфорлан да кальцийлан поян пеш сай натуральный ӱяҥдышлан шотлалтеш. Ик чывыштыш тыгай ложашым лакыш шавалтыза, тыге кушкыл вож сайын вияҥеш;
- кальцийлан поян муно шӱм (лакыш тыгыдемден ешарыза) ончыкыжым саскам шӱяш тӱҥалме деч арала.
Йыраҥыш кусарен шындымеке, томатым жапын-жапын ӱяҥден шогыман. Тидлан нуж вӱд лач лиеш, азотлан поян ты ӱяҥдыш кушкыллан ужарген кушкашыже пайдале. Кугурак атыш нужым пыштыза, ӱмбакыже вӱдым темыза да икмыняр кече шинчыктыза. Вӱд дене варен (1:10), томат вожыш шавыза.
Кушкыл одарланен кушшо манын, кукшо ру вӱдымат шаваш лиеш. 10 г рум да 2 кугу совла сакырложашым 10 литр леве вӱдеш лугыза. Ик-кок шагат шинчыктымеке, помидор вожыш шавыза. Тидыже вожым пеҥгыдемда да рокысо пайдале микроорганизм-влакым шукемда.
Помидор саска кушкаш тӱҥалмеке, ломыж вӱд лачеш толеш. Ик стакан ломыжым 10 литр вӱдеш лугыза, ик сутка шинчыктыза да шавыза.