«Сердце матери» волонтёр мер организаций специальный военный операций тӱҥалме ий гычак мемнан салтак-влаклан полша –электрооборудованийым, маскироватлалтме сеткым, вургемым, медикаментым, кочкыш сатум – илен лекташ да Шочмо эл верч пеҥгыдын шогаш чыла кӱлешым пога.
Гуманитарный грузым чумырен колтымо деч ончыч кугу паша ышталтеш. Тидын шотышто мер организацийын ик организаторжо Тамара Авгученко тыгерак палдара:
– Кызыт гуманитарный полышым погымашке калык начаррак ушна, пуйто чылан лыпланеныт да тыгай пуламыр каен шогымылан тунем шуыныт гай чучеш. А неле пагыт тыгак кая – салтак-влаклан полшымым чарныман огыл. Нунын деч заявке-шамыч чарныде толыт. Вет арвер эре шалана, пыта – тудым тушман пудештара.
Теве кодшо арнян салтак-влак дене вашлийна. Тиддеч ончыч машинашкышт дрон чоҥештен толын, йӧра, шкешт тӧрштен лектын утлен шуктеныт, а технике пытен – мотор веле «илыше кодын». Ынде рвезе-влак тудлан кӱлеш запчастьым погат. Садлан кызыт мыланна, волонтёр-влаклан да тыглай калыклан, полышым вияҥдыман веле – фронт мемнан дек лишемшаш огыл, салтак-шамычлан ончыко каяшышт мо кертмынам ыштыман, чолгарак лийман.
«Сердце матери» организаций нерген салтак-шамыч шукын палат да эре полышым йодын лектыт. А йодмышт почеш наледаш шуко шийвундым погыман. Кажне отгрузко кок млн наре теҥгеш шуэш. Заявке-влак шукемыт гына, мо кӱлешым наледаш утларак да утларак оксам луктын пыштыман.
– Газ баллон-влак, бензопила, маскироватлалтме сетке, тыгак блиндажым чоҥаш вагонко, скобо, пуда, саморез, йымал вургем да футболко, шем клеёнко, мотоцикл, дизельный генератор, экшн-камере, радиостанций да шуко молат эре кӱлыт. Чыла тиде – расходный материал, таче уло – эрла пудештарен кертыт. Салтак-шамыч шке задачыштым шуктен кертышт манын, мо кӱлешым колтенак шогыман.
Садлан Марий Элыште илыше-шамычлан каласыме шуэш: ӧрдыжеш ида код! Салтак-влак мемнам аралышт манын, меат мо кертмынам ыштышаш улына! – ойла Т.Авгученко.
«Илыме шуэш, икшывына ден уныкана-шамычын волгыдо ончыкылышт лийже» кӧргыштӧ ашныме тыгай шонымаш «Сердце матери» толкынын волонтёржо-шамычлан вий-куатым пуа да мемнам аралыше салтак-влаклан полшаш тарата.
Июнь мучаште Марий Элысе МВД ветеран-влакын советышт салтак-шамычлан гуманитарный полышым чумырен колташ чот полшен, пеш кугу заявке почеш чыла наледеныт.
Марий Элысе ОВД да элгӧргӧ войска ветеран-влакын советыштын председательже Виталий Южаков ойла:
– Организацийыштына куд тӱжем наре еҥ шотлалтеш. СВО тӱҥалмеке, икымше кече гычак полшена, чылаже 12 миллион наре теҥгеаш арверым салтак-шамычлан погымо. Кок арняште пел миллион теҥгем поген, Донбассысе йоча-шамычлан колтенна.
«Сердце матери» толкынат мемнан дек полышым йодын лектын ыле. Заявкым колтат – списке почеш наледена. Кажне район ушна, нунат оксам погат, шкештат наледат. Ты гана лу огнетушительым, мутлан, МЧС-ын республикысе тӱҥ управленийже гыч яра пуэныт. МВД машина орава-влакым ойырен, Йошкар-Оласе кондитерский фабрике сукара ден сушкым икмыняр коробка дене эре пуа, теве тушто пуымо кӱртньӧ кугу бочкымат, уголь дене темен, салтак-влаклан колтена. Наркоконтроль, налоговый полиций кызыт кольмо ден клеёнкым наледен пуышт. ОСБ плитам, генераторым, бензопила ден шуроповёртым, болгаркым Чебоксарыш наледаш миен коштам – тушто шулдырак. Туштат тыгаяк ветеран-влакын организацийышт дене кылым кучена. Оксам аныклен, шукырак арверым налаш тыршена. Южо кевытлаште СВО-лан наледыме нерген пален налыт да акым волтат.
Фронтышто улшо салтак-влаклан полшаш шонеда гын, «Сердце матери» организацийын офисышкыже (кажне паша кечын 10 гыч 16 шагат марте, рушарня – каныш кече) намияш лиеш. адрес: Йошкар-Ола, Эшкинин урем, 10б №-ан пӧрт, 112 каб.
Оксам Сбербанк картыш колташ лиеш: 2202 2036 1365 5283 Корчагина Светлана Николаевна, «благотворительность» манын палемдыман.
Авторын фотожо-влак.