Йошкар-Олаште шочшо Полина Муравьева кызыт МарГУ-со Тӱвыра да тӱвыра кокласе кыл институтышто музеологий да пӱртӱс ден тӱвыра поянлык объектым аралыме направлений дене кокымшо ий тунемеш.
Шукерте огыл тудо «МарГУ-н миссше» конкурсышко ушнен да «Талантын миссше» номинацийыште палемдалтын. Школышто тунеммыж годым Полиналан пеледышым пӧлекленыт, а тушко «Мисс Марий Эл» манын возен пыштеныт. Тылеч вара моторлык конкурсыш ушнаш кумылжо утыр ешаралтын.
Артист койышан
Полинам ача-аваже вич ияшыж годсек мураш тунемаш коштыкташ тӱҥалыныт. Варажым Йошкар-Оласе 5-ше номеран йоча сымыктыш школым фортепиано дене тунем пытарен. Туштак виолончель дене шоктен, а тунем лекмекыже, шкежак гитарым кидышкыже налын.
Сеҥымашыжат ятыр погынен. Полина шочмо республикыштыже гына огыл, Моско ден Санкт-Петербургысо сценылаштат мурен, Российысе да тӱнямбал конкурслаште лауреат лийын. Тидыже ДТЮ-н «Нотки» ансамбльжын педагогшо Ольга Токареван моштен туныктымыжлан кӧра, манеш Полина.
2-шо класс гычак актёр мастарлыкым ончыктен. 5-ше классыште улмыж годым чолга ӱдырым пионер радамыш пуртеныт. Моло йоча-влак дене пырля волонтёр пашам шукташ кумылаҥын.
– А Йоча да самырык-влаклан усталык пӧртыштӧ йоча мероприятийлам вӱденам, актрисын рольжымат модынам. Усталыкын чыла шӧрынжым йӧратем: яра жапыште книгам лудам, номер почеш картиным сӱретлем, LEGO фигурко-влакым погем, а шукерте огыл йолташ ӱдырем-влаклан таро почеш мужедаш тӱҥалынам, – каласкала Полина.
2017 ийыште Санкт-Петербург гыч композитор Сергей Савенков Полиналан «Йошкар-Олинский вальс» мурым пӧлеклен. Тудлан клипым ыштен. Ты сеҥымашлан ӱдырым «Артекыш» колтеныт. Туштат ойыртемалтын: сочиненийже «Артекын» книгашкыже логалын, тыгак отряд кокласе таҥасымаште 2-шо степенян медалян лийын. 10-шо классыште психолого-педагогический направлений дене тунеммеке, «Орлёнок» лагерьын педагог-влакын сменышкышт логалын. Тушто англичан йылме дене 1-ше верым сулен.
2026 ийыште Полиналан факультетыштыже культорг лияш ӱшаненыт. Тудын вуйлатымыж почеш кызыт студент-влак «Студвесна» конкурслан ямдылалтыт. Тидым ӱдыр тӱҥалтыш пашалан шотла да ятыр кӱкшытыш шуаш шона.
Проект паша
Мо оҥайже: Полина конкурс шомаклан моткоч куана. А илыш девизшым тыгай шонымаш дене пеҥгыдемда: «Илышемын келгытше – чын лиймаште, пӱрымашем – ончыко кайымаште, сеҥымашем – чолгалыкыште!»
Эше школышто тунеммыж годым проектым куанен ыштен, элна да тӱнямбал кӱкшытыштат участвоватлен, утларакше 1-ше да 2-шо верлам наледен. Эн оҥай проектше пырчан шурно нерген лийын, тунам Полина республикысе пасу мучко шымлен кудалыштын.
Эше П.Муравьёва англичан йылмылан шӱман. Тидлан Йошкар-Оласе «Матур» школышто келгын туныктеныт. Йот йылме дене олимпиадыште икымше верышкат лектын. 10-шо классыште тунеммыж годым «Хочу стать учителем» видеороликше 2-шо вер дене аклалтын, а 11-ше классыште «Правильный путь» пашаже 1-ше верым налын.
Полина студент жапым оҥайын да кӱлеш семын эртараш шона. Тунемаш да мероприятийлашке чулымын ушнаш да студент илыш дене ракатланен илаш кӱлеш, манеш!