Йошкар-Оласе 27-ше №-ан школышто тунемше Анна Чепакова (фотошто — шолаште) ден Екатерина Никитина Самара олаште эртаралтше Шарнымаш Парадыште лийыныт. Шукерте огыл Йошкар-Оласе Самырык-влак полатыште ӱдыр-влакым наградитленыт – «В память военного парада в Куйбышеве 7 ноября 1941 г.» шарнымаш знак да образцовый строевой подготовко, дисциплине да йӱлам жаплымылан таумут серыш дене. А.Чепакова дене лишкырак палыме лийына.
Анна 9-ше классыште тунемеш. Тудлан математике, ОБЗР (Основы безопасности и защиты Родины), технологий урок-влак утларак келшат. Ӱдыр школ илышыш чолган ушна: олимпиадылаште шинчымашыжым терга, «Движение Первых» толкынын еҥже.
– Ончычсо класс вуйлатышына Оксана Евгеньевна Белоруссова 2024 ийыште Самара оласе парадыште участвоватлаш маршировкыш ӱжын. Мыланем келшен, садлан умбакыжат ты направленийыште шкем шуараш шонен пыштенам. Слётлаш ушнен, шкем гаяк моло ӱдыр-рвезе дене палыме лиям, ум пален налам.
Школыштына ты направлений дене мероприятий шукыжак ок эртаралт, садлан тидын шотышто шке гыч умылкалаш тыршем. Йошкар-Оласе парадыште, Самара оласе парадыште лийынам, военно-патриотический слётлаш коштам, – каласкала А.Чепакова.
Аннан тунемме классше юнармий направлениян огыл. Самара оласе парадыште лиймыж нерген Анна 8-ше классыште тунеммыж годым класс вуйлатышыж деч пален налын. Катя Никитина ден когылянышт тушко ушнаш темлен, ӱдыр-шамыч уло кумылын келшеныт.
– Тидлан моткоч пеҥгыде отборым эрташ кӱлын. Марий Эл гыч 60 еҥ тушко миенна. Парад 7 ноябрьыште лийын. Октябрь тӱҥалтыште мемнам погеныт да икмыняр шагат дене тренироватленыт. Пеш шуко маршироватленна. Самара олаште эртаралтше парад годым тургыжланенам, туге гынат тушто лийме моткоч келшен, тиде эрелан шӱмыштем кодеш. Тыге ме, кушкын толшо тукым, коча да кугезе кочана-влакын подвигыштым шарнымым да жаплымым ончыктена, тыныс илыш верч илаш-колаш кредалмыштлан тауштена, – манеш ӱдыр.
Анна Чепакова ден Екатерина Никитина 9 майыште Йошкар-Оласе Сеҥымаш парадыштат лийыт. Тидлан тыгак шуко ямдылалтыныт. Аннан палемдымыж почеш, ончыкыжымат, 10-шо классыш вончымекыже, тудо шкенжым юнармий направленийыште шуараш шона. А вашке экзамен-влак тӱҥалыт, Анна тиде пагытлан кыртмен ямдылалтеш.