Пион мотор пеледышыже да тамле пушыж дене куандарыже манын, ты кушкылым шошым чер деч аралыман, ӱяҥдыман. Лум шулен пытымеке да леве игече толмеке, пионын ӱмашсе «пундышыжо-влакым» мланде пелен пӱчкеден кораҥдыман. Нуным шупшкедыман, тодыштман огыл – вож гыч лекше тыгыде шытыш-влакым катен кертыда. Пионын вожшо «шӱлыжӧ» да вӱдым сайын шупшын кертше манын, кушкыл йыр мландым пушкыдемдыман.
Свежа вурго-влак лекташ тӱҥалмеке, азот ӱяҥдышым шавыман (5 л вӱдлан – 10 г мочевине). Варарак калий (ик вондылан – 100 г ломыж) ӱяҥдышым пуаш лиеш, пеледышлыкым погаш тӱҥалмыж годым – фосфорым (суперфосфатым).
Шошым пионлан вӱд шукак кӱлеш: шуэнрак, но сайынак шавыман, тыгодым, шавымеке, кушкыл тӱҥыштӧ вӱд шинчышаш огыл.
Пион чӱчкыдын черланыше кушкыллан ок шотлалт. Южгунам «серая гниль» манме грибок чер витарен кертеш – самырык кушкыл пӱтырналт кушкеш да шӱяш тӱҥалеш. Ты грибокым медный купорос пытараш полша.