Морко район Унчо селаште илыше Анфиса Михайлова ынде икмыняр ий пакчаштыже тӱрлӧ мотор пеледышым кушта. Росотам шке ямдыла, нӧшмым телымак ӱдаш тӱҥалеш.
Чоным кандарыше сомыл
– Тиде мыйын хобби, манаш лиеш. Шке сад-пакчам мотор пеледыш дене сӧрастарыме сомылым йӧратен шындем манын, ончычрак шоненат омыл. Мландыште пургедме, ӱдымӧ-шындыме годым чонем дене канем. А кунам ыштыме пашан лектышыже шинчам куандара, тунам эшеат йывыртем.
Шкемым тиде сомылышто профессионаллан ом шотло. Южгунам уда лектышат лиеш. Ала-молан эустомам ончен куштен ом мошто – тиде кушкылым пеш «койышанлан» шотлем. Тыгак бегоний ок куш: пеледалтыт гынат, варажым шуленак пытат. Кузе гына нуным утараш толашен омыл?! Тений январьыште уэш эустома ден бегонийым ӱденам. Ты гана нуным куштен сеҥем мо, ончалам. Шке шонымашкем шумеш ом чакне – койышем тыгай, – манеш Анфиса.
Ӱяҥдышым йӧратат
Ятыр ий А.Михайлова кашполаш петуний-влакым шында. Тыглайым, махровыйым, «гигант-шамычым». Йӧратыме сортшо – «Тайдал вей вред велюр». 30-40 литран кашпош шындыме ик озым вондер семын шарлен кушкеш. Кеҥеж мучко пеледеш, шыже тӱҥалтыште кылмымат чыта.
– Петуний ӱяҥдышым чот йӧрата. Мый гын витаминный комплексым налам. Кызыт кевытыште тӱрлӧ кушкыллан келыштарыме ямде ӱяҥдышым ужалат. Пеледаш тӱҥалме годым янтарный кислотам кучылтам. А пеледыш росота одарланен кушшо да вожшо пеҥгыде лийже манын, кальциевый селитрым шавем, – манеш сад-пакчазе.
Тудо пеледышым январь мучаштак ӱдаш тӱҥалеш. Изин-изин, но шуко тӱрлым ӱда. Тошто нӧшмым ок кучылт – свежа нӧшмӧ сайын шыта, озым вашке кушкеш. Росотам ончыч окна ончылно кушта, а шошым теплицыш луктеш.
Икте пелед пыта, весе тӱҥалеш
Тений петуний деч посна матиолам, икияш лапка георгиным, львиный зевым, дельфиниумым, бархатцым, вербена боннарскаям, лавандым ӱден. Эше пӱтырналт кушшо долихос ден кобеям савар пелен шындынеже.
– Шыже тӱҥалтыште нӧшмым погем. Кумшо ий почела икияш георгиным («Весёлые ребята») шке ыштыме нӧшмӧ гыч куштем – пеш моторын пеледалт шогалыт. Висвисым (нивяник), остеоспермумым, китайский астрам, рудбекийым тыгак шке погымо нӧшмӧ гыч куштем, – ойла озавате.
Михайловмытын садыштышт эше шуко тӱрлӧ роза кушкеш. Тюльпан да шоган дене шындыме моло пеледышымат тӱрлым шындат. Анфиса кушкылым тыге келыштарен шында: икте пелед пыта, почешыже весе пеледаш тӱҥалеш. Тыге сад-пакчаштышт – эре мотор.
Пеледыш деч посна Михайловмыт пакчаштышт тӱрлӧ эм шудым куштат: пӱртньыкым, мӱкшпеледышым, висвисым. Тамле шудо чайым йӱыт веле огыл, эше нуным куэ выньыкыш ешарен пидыт. Телым мончаш пурымо годым шудо пуш тамлын ӱпшалтеш да пайдам пуа.
А.Михайлован альбомжо гыч налме фото-влак.