Сентябрьыште шоганан могай пеледышым шындыман?
Гиацинт. Ты пеледышым сентябрьын кокымшо пелыж гыч октябрь кыдал марте шындаш темлалтеш. Кугурак шоганым (5 см диаметран), икте-весе деч 15-20 см кужытым коден, 15-18 см келгыт рокыш чыкыман. Изирак диаметран шоганым чӱчкыдынрак да чот келгыш огыл кералаш лиеш.
Крокусым тыгак сентябрь кыдал гыч октябрь кыдал марте шындыман. Пеледышын шоганжым тӱшка дене, икте-весе деч 5-6 см кужытым коден, рокыш урыман. Келгытше 6-8 см лийшаш.
Нарциссым август мучаш гыч сентябрь мучаш марте шындыман. Тудым келгырак лакыш, икте-весе деч 15-20 см коден шындыман.
Сцилла пеледыш кычалтылше кушкыл огыл. Садлан тудо сайын илана. Шоганым сентябрь гыч октябрь кыдал марте шындаш лиеш. Тудым 3 см келгытыш, икте-весе деч 5 см коден, рокыш урыман.
Тюльпаным сентябрь мучаш гыч ноябрь тӱҥалтыш марте шындаш лиеш, вашкыман огыл, тӱҥжӧ – южын температуржо 10 градус деч юалгырак лийшаш. Уке гын, леве игечыште тудо шытен лектын кертеш. Изирак шоганым 6-8 см, кугуракым 12-14 см келгыт рокыш урыман. Коклаштышт 8-10 см кужытым кодыман.
ОЙ-КАҤАШ
Шукияш пеледышым теле йӱштӧ да тӱрлӧ чер деч аралаш манын, тыгай йӧнлан эҥерташ лиеш. Кушкылын вургыжым мланде дене тӧр пӱчман, йырым-йырысе кумдыкыш вӱргене купоросан вӱдым шавыман, пластик яшлыкым унчыли шогалтен, ӱмбачынже плёнко дене леведман. Тыгодым кушкылыш юж логалын кертшаш. Леведышым мардеж пуал ынже шу манын, мланде дене пеҥгыдемдыман.