Паша гыч шукерте огыл каенам, вес пашашке эше пурен шуктен омыл. Ты жапыште черланенам. Ик палымем тошто паша верыштак больничныйым тӱлышаш улыт манеш. Чынак мо?
СВЕТЛАНА.
Морко район.
Россий Социальный фондын Марий Элысе пӧлкаж гыч умылтарат:
– Паша гыч кайымеке, 30 кече жапыште черланенда але сусыргенда, но вес пашаш пурен шуктен огыдал гын, больничныйым налын кертыда. Паша гыч кайымекыда, икшывыда але вес лишыл еҥда черланен гын, пособий огеш тӱлалт.
Паша стажым ончыде, кокла пашадарын 60 процентше тӱлалтеш. Икымше кум кечылан ончычсо пашам темлыше тӱла, моло кечылан – Россий Социальный фондын Марий Элысе пӧлкаже. Пашам темлыше больничныйын шке ужашыжым пашадарым пуымо лишыл кечын пуа, а СФР – кӱлеш сведенийым налмеке, лу паша кечыште.
Паша гыч кайымеке, 30 кече эртен огыл, но у паша верышке пуренда гын, больничный у пашам темлышылан пура да тудо пашам ыштыше-влаклан тӱлымӧ радам почеш тӱлалтеш.