Тений январь-августышто Марий Элыште паша верым ситарыме службын полшымыж дене 2177 еҥ паша верым муын, палдара «Работа России» кадровый рӱдер. Нунын кокла гыч 1869 еҥже кужу жаплан пашаш пурен гын, 308 еҥ – жаплан гына.
Тыгодым социально кӱлешан паша специальность-влак утларак йодмашан улыт. Утларак еҥ сиделкылан, подсобный пашазылан, социальный пашаеҥлан, ужалыше-кассирлан пашаш пурен.
Инвалид, шуко шочшан ача-ава, кугурак ийготан еҥ-влак, паша опыт деч посна выпускник-шамыч, ийготыш шудымо ӱдыр-рвезе-влак – нине категорий еҥ-влаклан паша верым кычалаш куштылгыжак огыл, садлан паша верым ситарыме рӱдерын специалистше-шамыч нунылан (тыгайже 1506 еҥ лийын) поснак кугу тӱткышым ойыреныт.
Рӱдерыште еҥ-влаклан тичмаш услугым пуат: сай резюмем возаш, келшыше вакансийым ойыраш, оксам тӱлыде тунемаш але йодмашан профессийлан квалификацийым нӧлташ колташ полшат. Паша верым кычалше кажне кумылан еҥ «Работа России» портал гоч але илыме вер почеш паша верым ситарыме рӱдерыш полышым йодын миен кертеш.