Курыкмарий район Картук селасе фельдшерско-акушерский пунктышто земский фельдшер Анна Когаринова пашам ышташ тӱҥалын.
Верысе калык тидлан моткоч куанен, вет ты ФАП-ште вуйлатыше кум ий лийын огыл. Садлан черлыеҥ-влаклан медполышлан Йоласал селасе врачебный амбулаторийыш каяш кӱлын. Тушко машина дене 10 минут наре кудалман, а илалше еҥ-влаклан йолын миен шуашышт нелырак лийын.
– Чебоксар оласе медколледж деч вара шочмо Курыкмарий районыш пашаш толаш шоненам ыле. Но тунам келшыше паша вер лектын огылат, Чувашийыштак кодынам – санаторийыште да ик частный клиникыште тыршенам. Мӧҥгем эре шупшын. Ӱдырналан ик ият пеле теммеке, пелашем дене шочмо Чеботай ялышкем илаш куснаш шонен пыштенна. Козьмодемьянскысе межрайонный эмлымвер вуйлатыше дене кутыренам, тудо мыланем Картук селасе ФАП-м вуйлаташ темлен. Чеботай ял гыч тушко машина дене 10 минутышто миен шуаш лиеш. Паша верышкем пелашем намиен кода, южгунам шкеат машинаш шинчын кудалам. Фельдшерско-акушерский пунктын оралтыже тошто, но йодмем почеш тушко газымат, вӱдымат пуртеныт. Пелашем иктым-весым тӧрлаш полшен, да мый пашам тӱҥалынам веле. Тӱҥалтыште мыланем Козьмодемьянск оласе эмлымверын тӱҥ медшӱжарже Фаина Геннадьевна Крючкова ден Йоласал врачебный амбулаторийын кугурак медшӱжарже Надежда Филимоновна Александрова полшеныт, – каласкала Анна Когаринова.
Фаина Геннадьевна самырык фельдшер нерген тыгерак палемда:
– Анна Александровна нерген сайым гына каласаш лиеш. Моткоч чулым, межрайонный эмлымвер гыч мобильный медицинский комплексымат ӱжыктен шуктен. Яллаш лектын коштыныт да тергымашым эртареныт. Воктенысе 10 ялыште 500 наре еҥ ила, нунын коклаште – 40 йоча.
Палемдыман, тений «Земский фельдшер» программе почеш Курыкмарий район деч посна ФАП вуйлатыше-влакым Звенигово, Килемар, Марий Турек, Медведево да Шернур районласе яллаште вучат. Кыдалаш звеношто тыршыше специалист-влаклан 750 тӱжем теҥге компенсационный выплатым тӱлат. Договор почеш нуно земский врач семынак медорганизацийыште 5 ий пашам ыштышаш улыт.