Курыкмарий округ гыч СВО-н ветеранже Андрей Замятин «Лучший по профессии» конкурсын регионысо йыжыҥыштыже сеҥен. Профессионал-влак коклаште тыгай таҥасымашым эртарымаш «Человек труда» федеральный проектын ик ужашыжлан шотлалтеш. Тудо «Кадры» нацпроектын эн тӱҥжӧ лиеш.
А.Замятин спецоперацийыште кок ий наре лийын. Нелын сусыргымеке, тудым комиссоватленыт. Кредалмаште лӱддымылыкым да патырлыкым ончыктымыжлан Жуковын медальже, ятыр кугыжаныш да ведомственный награде-влак дене суапландареныт. 2025 ий сентябрьыште Андрей Замятинлан Виловат селасе кыдалаш школым вуйлаташ ӱшаненыт. Самырык профессионал кундемнан чапшым ынде федеральный йыжыҥыште аралаш тӱҥалеш.