Медведево посёлкышто шочын-кушшо да кызытат туштак илыше Виктория Загайнова дене ик гана вашлийын кутырымекак, тудын тӱрлӧ шӧрынан улмыжо палдырна, чолгалыкше шижалтеш.
Школ деч вара ӱдыр экономистлан тунем лектын, но чонжо йодмо почеш педагогический образованийым налын да кызыт йочасадыште дефектологлан пашам ышта. Эшежым Медведево тӱвыра полатысе «Маска» калык театрыш 7-ше класс гыч коштеш. Шукерте огыл театрышт Российын сулло коллективше лӱмым сулен.
Кок вуз, кок диплом
– Школ деч вара Политехыш экономистлан тунемаш пуренам. Но тиде йоча годсо шонымашем огыл ыле – классыште пырля тунемше ӱдыр тушко пурен да йолташ семын мыят документем пуэнам. Адакшым мӧҥгӧ деч торашке кайымем шуын огыл, садлан Йошкар-Оласе вузым ойырен налынам. Тунам педагог профессийым налме нерген шоненат омыл.
Икана студентем годым йоча лагерьыште вожатый лийын онченам да умыленам: йоча-влак дене пашам ыштынем. Туге гынат экономист специальность дене дипломым налынам. Да МарГУ-ш пуренам, ындыже – шонен пыштыме профессийлан. Экономический факультет деч вара педагогикыш «шуҥгалташ» куштылгыжак огыл ыле, – каласкала В.Загайнова.
Виктория Евгеньевна йочасадыште 2018 ий годсек пашам ышта. Дефектолог вияҥмаште нелылык дене тӱкнышӧ икшыве-шамыч дене занятийлам эртара – шарнен кодмо, тӱткылык, уш-акылым вияҥдыме упражнений-влаклан эҥерта. Шинчашт начарын ужшо, пыкше коштшо ӱдыр-рвезе-шамыч дене пашам ышта.
– Тиде профессий куштылго огыл, кажне йоча дене кылым ыштен моштыман. Занятий-влакым модмо семын эртарена, садлан икшыве-влак уло кумылын мый декем коштыт, – манеш педагог.
«Тушто чон дене канем»
Ӱдыржылан 9 тылзе теммеке, Виктория арнялан кок гана «Маска» театрыш репетицийыш уэш кошташ тӱҥалын. Театр – илышем, тушто чон дене канем, манеш шкеже. Театрыште школышто тунеммыж годымак модын. Пырля тунемше кок ӱдыр тушко коштын, ик ий гыч Викторият ушнен. Да ынде тиде вер чонышкыжо шыҥенак пурен.
Репертуарышт тӱрлӧ: йоча-влаклан йомак гыч тӱҥалын классический спектакль марте. Шукерте огыл «Мёртвые души» спектакльым шынденыт, Виктория тушто Анна Григорьевнам модын. «Аленький цветочек» постановкымат ямдыленыт.
– Ныжылге ӱдырын образшым, мутлан, «Аленький цветочек» произведенийыште Настенька гайым, чоҥаш ом йӧрате. Тыгайже мылам нелын пуалтеш. Вувер Кува, ӱчым ыштылше иктаж персонаж, його еҥ – йӧратыме ролем-влак улыт. Сценыште модмо годым огыл гын, кунам эше отрицательный персонаж лийын ончет?! Вет илышыште тыгай омыл да ынем лий.
Сценыште модмо дене шкем почын пуэм, шуарем. Адакшым тиде мыланем калык дене моштен кутыраш полша: дикций саемеш, тидыже пашаштемат моткоч кӱлешан, – ойла актрисе.
Спектакльлашке Викториян ача-аваже кажне выступленийыш коштыт. Вич ияш ӱдыржат тений гыч театральный студийыште шуаралтеш. Залыште лишыл еҥ-влак улмо куандара, тыгодым кӧргыштыжӧ тургыжланымашымат ешара манын палемда уста еҥ.
Тений «А ну-ка, девушки!» республикысе конкурсым ончаш мийымем годым В.Загайнован артист койышан улмыжым мыят куанен ончышым. Тушкыжо тудо йочасад вуйлатышын темлымыж почеш икымше гана ушнен. Ямдылалтмаште сценыште пырля модшо ӱдыр-влак, йочасад коллектив полшымылан кугу таум ойла. Конкурс годым тургыжланенам гынат, выступатлымем деч куаным налаш тыршенам, манеш чолга Виктория.