24-27 августышто Морко район Унчо селаште Пашаче самырык тукымын палаточный форумжо эртаралтын. «Молодёжь и дети» нацпроектын «Регион для молодых» федеральный проектлан келыштарыме мероприятийыш Марий Эл гыч 80 наре самырык еҥ: наставник, волонтёр, студент-влак – ушнен.
Форум нерген тудын ик организаторжо, Морко муниципальный район администрацийысе молодёжный политике шотышто пӧлкам вуйлатыше Анжелика Самигуллина палдара:
– Палаточный форумым кушто эртарыме шотышто шуко шонкалыме огыл – 2019 ийыште Шоруньжа села Марий Элын тӱвыра рӱдыжлан шотлалтын, адакшым ты кундемыште ятыр лӱмлӧ еҥ шочын-кушкын.
Форумлан поян программым ямдыленна, тыгодым тудо самырык-влаклан оҥай лийже манын келыштаренна. Икымше кечын участник-влак икте-весе дене палыме лийыныт гын, кокымшо кечын, мероприятийым пайремлын почмеке, Военно-исторический обществын Морко отделенийжын еҥже Сергей Валлерианович Галкин «От Северной Руси до Российской федерации» лекцийым лудын. Ӱдыр-рвезе-шамычлан ондакысе да кызытсе жап кокласе кыл нерген пален налаш оҥай ыле, нуно шкештат йодыш-влакым пуэденыт да каҥашымашке чолган ушненыт.
Форумын кокымшо кечыже Волжскысо да Шернурысо епископ Феофан дене вашлиймаш гыч тӱҥалын. участник-влак кызытсе моткоч писын вашталтше саманыште чон поянлык нерген кутыреныт. Тылеч вара Марий Элысе Самырык-влак полатын молодёжный политике шотышто директорын алмаштышыже Лариса Вячеславовна Лоскутова республикыштына самырык-влаклан политике вияҥме да чолга ӱдыр-рвезе-влаклан шонымашым илышыш пурташ полшышо тӱрлӧ йӧн улмо нерген ойлен. А «Передовик» ялозанлык артельын председательже Юрий Арсентьевич Игнатьев кызытсе экономикын ончыкылыкшо дене палдарен. Программын ик эн тӱҥ ужашыжлан Марий Элысе МВД пашаеҥын лудмо «Профилактика экстремистских и террористических проявлений в цифровой среде» лекцийым шотлыман. Вет чыла гаяк ӱдыр-рвезе кызыт онлайн-тӱняште «ила», туштат лӱдыкшыдымылык нерген мондыман огыл. Тӱвыра темымат ӧрдыжеш кодымо огыл – участник-шамычлан Унчо этнотӱвыра комплекс мучко экскурсий лийын. А кастене ӱдыр-рвезе-влак «Вехи истории» уш-акылым пудыратыме квизыште историйым палымыштым тергеныт.
Форумын кумшо кечыжат ӱдыр-рвезе-шамычлан пеш тӱвыргӧ лийын. Эрденак нуно социальный проектирований тӱняш логалыныт: кӱлешан идейым муын, грантым налаш проектым возен, йодмашым пуымо дене палдареныт. Варажым верысе усталык студий-влакын мастар еҥышт мастер-классыш ӱжыныт: участник-шамыч шкештат марий тӱран кидпашам ыштымашке уло кумылын ушненыт. А кечывал деч вара опытан наставник-влак военно-прикладной дисциплине-влак дене тӱрлӧ мастер-классым эртареныт.
Икманаш, Пашаче самырык тукымлан палаточный форум ӱдыр-рвезе-шамычлан чыла шотыштат пайдале лийын: нуно шуко ум пален налыныт, усталык тӱня дене лишкырак палыме лийыныт, койыш-шоктышымат пеҥгыдемденыт. Ты мероприятий икте-весым колын да колышт моштымо, у идейым кычалме, иксемын шонышо-шамычым иквереш чумырымо верыш савырнен. Тыште кажне участник шкаланже кӱлешан шомакым чонышкыжо пыштен, да ончыкыжым тиде кугу ошкылым ышташ полша манын ӱшанена.
Ынде ӱдыр-рвезе-влак сайын палат: кабинетыште шинчен але онлайн курс-влакым эртен веле огыл шкем шуараш лиеш – палаточный лагерьыште тидым ышташ оҥайрак.
Екатерина Каменская:
– Форумыш ушнаш Морко районысо администрацийыште темленыт, да мый уло кумылын келшенам. Ты мероприятийлан программым моштен келыштареныт. Грантым налаш проектым кузе чын возымо нерген пален налаш поснак оҥай ыле. Военно-прикладной дисциплине дене мастер-класс-влакат моткоч пайдале лийыныт. Пожарым йӧртымӧ практике годым йӱр йымак логалме, тыгак «Вехи истории» квиз кужу жаплан шарналт кодыт.
Тыгай сынан мероприятийлаште ме, самырык-влак, икте-весе дене палыме лийына, шуко ум да пайдалым пален налына. А эн тӱҥжӧ – палаткыште иленна! Кызытсе жапыште тидыжак мом шога – перезагрузко манметлан пеш полша.