Куяр посёлкысо «Авангард» сарзе-патриот рӱдерыште молодёжьлан республикысе «МолодЙошка» форум эртаралтын. Тушто «Росмолодёжь. Гранты» Всероссийский конкурсышто сеҥыше-шамычлан грантым кучыктеныт.
Эн кугу грантым 800 тӱжем теҥгем Иван Крусановын «Паша Тура» регион-влак кокласе карьере шотышто слётшо проект-пашаже сулен. Рвезе – «Россмолодёжь.Гранты» кугыжаныш программын Марий Эл деч амбассадоржо. Тудо Угарман кундемысе Ветлуга олаште шочын-кушкын. 2021 ийыште Йошкар-Оласе Волгатехыш тунемаш пурен, визымше ий тудын студентше. Тылеч посна самырык еҥ вузын Молодёжный политике шотышто департаментыштыже тырша.
– Тӱҥ пашамлан университетыште проект да грант сомылым вораҥдарымаш шотлалтеш. Икымше проектым 2024 ийыште возенам. Тачысе кечылан шкемын кокыт да вузын ик проектше улыт. Ты аланыш чолга, чыла вере шуаш тыршыше койышем конден манаш лиеш. Тыгак «Росмолодёжь.Гранты» программе шке шонымашым илышыш шыҥдараш полшышо ик эн сай йӧн улмым умыленам.
«Паша Тура» регион-влак кокласе карьер шотышто слёт Марий Эл, Угарман, Виче кундемысе молодёжьлан пашазе профессийын кӱлешлыкше нерген палдараш келыштаралтын. Садлан мыйын тӱҥ шонымашем – самырык-шамыч коклаште тыгай профессий-влак шотышто трендым ышташ да виян ушемым чумыраш.
Слётыш пашазе молодёжьым ушаш манын, команде дене эн ончыч пиар кампанийым эртараш шонена. Вара слётлан кыртмен ямдылалташ тӱҥалына, – каласкала Иван.
Рвезе тыгак грантым сеҥен налмыж деч вара чоныштыжо могай шижмаш озаланен, пайлалте:
– Сеҥем але уке, пален омыл. Форумым пайремлын мучашлыме годым икымше радамыш шинчаш йодмекышт умыленам – сеҥыше-шамыч коклаште улам. Тидлан моткоч йывыртенам.
Иван чӱчкыдын тӱрлӧ мероприятийыште, форумышто, проектыште участвоватла. Садлан яра жапше укеат. Но тыгай тат лекме годым лишыл еҥже-влак дене эртараш тырша. Нуно рвезым у пашалан кумылаҥдат, вийым ешарат, манеш. Тудо ойла:
– Самырык ӱдыр-рвезе-шамычлан шке шонымашым илышыш шыҥдараш да у деч лӱдаш огыл тыланем. Тидланже «Росмолодёжь.Гранты» сайынак полша.