Тыге каласыш 31 август гыч 3 сентярь марте Чебоксарыште эртаралтше «Твой герой» семинарыште лийше Виталий Кутюков.
Семинар полша
Молодёжьым патриотизм шӱлышеш шуарыме шотышто ты мероприятий тудлан путырак келшен. Тушто Виталий шуко ум пален налын да эн тӱҥжӧ кузе Патырлык урокым пайдалын эртараш кӱлмым умылен. Тылеч ончычат тыгай урокыш коштын, а ынде тудым утларак кугу кумыл дене эртараш тӱҥалам, манеш.
Семинар деч вара участник-влак Чебоксарысе школлаште Патырлык урокым эртарен онченыт. Виталий тусо 1-ше номеран школышто лийын. Йоча-влаклан ветеранын каласкалымыже келшен, тунемше-влак землякнан кумылжымат нӧлталыныт. А вара нунылан тунем лекме нерген сертификатым кучыктеныт.
Шке кумылын каен
Виталий Медведево район Руэм посёлкышто шочын-кушкын. Кызыт ешыж дене туштак ила. Анастасия пелашыж дене пырля кок ӱдырым да ик эргым ончен куштат.
Эртыме боевой корныж шотышто Виталий теве мом каласкалыш:
– 2023 ийыште, шке кумылын контрактым подписатлен, СВО-шко каенам. Авдеевка оласе направленийысе штурмовой отрядыш логалынам. Боевой задачым шуктымо годым миномёт гыч лӱйкалымашлан кӧра чот сусыргенам. Но ты вер гыч 12 шагат эртымеке веле луктын кертыныт. Шуко жап госпитальлаште эмлалтынам. Кок кидыштем да шола йолыштем операцийым ыштеныт, чылаже кумытым, тыгак нервым ургеныт. А 2024 ий мучаште Россий Вооружённый Вий радам гыч мыйым луктыныт. Кызыт 2-шо группо инвалид улам.
Службо деч вара «Защитники Отечества» фондын Марий Элысе пӧлкашкыже полышым йодын мийышым. Илышыштем спортлан верым муым. Школышто тунеммем годым секцийлашке монь коштын омыл, лачак йолташем-шамыч дене мечым чуменам. Кызыт пуля дене да пикш гыч лӱйкалымаш, иймаш дене таҥасымашлашке ушнем. Кодшо ийын Дзержинск олаште «Элым аралыше-влакын кубокышт» регион-влак кокласе турнирышке коштынам. Улан-Удэ олаште «Герои нашего времени» лӱман пуля дене лӱйкалымаш шотышто таҥасымашыште ӱчашенам. А иймаш дене таҥасымаш Самара олаште лийын ыле, тушкат миенам.
Варажым йоча-влакым патриотизм шӱлышеш шуарыме пашашке ушышт, тӱрлӧ школышто Патырлык урокышто лийынам.
Тений августышто Москошто «Вместе победим» форум эртаралте. Тудо Воробьёв курыкышто кок кече шуйныш. Форумышто спецоперацийын участникше-влаклан полшымо шотышто тӱрлӧ площадке пашам ыштен. Спикер-влак коклаште фонднам вуйлатыше Анна Цивилёва, Россий МИД-ын официальный представительже Мария Захарова да молат лийыныт. Чылажат моткочак келшен.
Шке пашам почын
Ондак Виталий Кутюков тӱрлӧ пашам шуктен, тӱҥ шотышто водительлан тыршен. Тылеч ончыч, 2003-2005 ийлаште, Мӱндыр Эрвелыште танковый войскаште служитлен, Т-80 танкын оператор-наводчикше лийын.
Тений мартыште землякна соцконтракт почеш шке пашажым почын. Тудо кугыжанышын пуымо 350 тӱжем теҥге дене бензо- ден электроинструментым налын. Нуным кызыт калыклан прокатыш пуэда, тидлан интернет полшымо дене уверым тӱрлӧ вере вераҥда. Ассортиментшым ешаренак шога.
13 сентябрьыште элыштына Танкист-влакын кечышт палемдалтеш. Ондакысе танкистым ты кече дене саламлена, чыла шонымашкыже шуаш тыланена.