Кызыт ятыр вере пасула олмеш чодыра кушкын шогалын. Тудым руаш лиеш мо?
Ялозанлыкын мландыштыже пушеҥге але вондер кушкеш гын, тугеже мландым целевой огыл кӱлешлыклан кучылтмо.
Ялозанлыкын мландыштыже чодырам кучылтмо, аралыме, оролымо шотышто РФ Правительствын 2020 ий 21 сентябрьыште лекше пунчалыштыже пеҥгыдемдыме («Об особенностях использования, охраны, защиты, воспроизводства лесов, расположенных на землях сельскохозяйственного назначения»).
Тыгай кумдыкышто кушшо пушеҥге да вондер чодыралан шотлалтеш, кунам тудо 0,5 гектар деч утла верым айла, а пушеҥге-влак 5 метр деч кӱкшӧ улыт; тыгодым чодыран вер мланде участкын 75 утла процентшым авалтен.
Тиде мландын озаже але уполномоченный еҥже 2023 ий 1 октябрь марте але праван лиймыж деч вара кок ий жапыште ялозанлыкын мландыжым чодыра семын палемдаш Россельхознадзор управленийыш йодмашым возен кертеш. Ты вашмутым Пӱртӱс поянлык, экологий да йырвелым аралыме министерствыш моло документ дене пырля колтыман.
Эксперт-влакын заключенийыштым налме деч вара чыла материалым Россельхознадзорын межведомственный комиссийже онча. Варажым чодыра семын кучылташ лийме шотышто иктешлымашым возышаш улыт, тыгак проект, чодыра деклараций ышталтыт, тиддеч вара гына чодырам руаш лиеш.