Россий ФСИН-ын Марий Элысе управленийжын 6-шо №-ан колонийысе режимный зоныш шукерте огыл телефоным пурташ толашеныт. Но режим да надзор отделын пашаеҥже-влак тидым шекланен шуктеныт.
Ӱдырамаш ты учрежденийыште шинчыше эргыж дек свиданийыш толын улмаш. Могай арверым тушко пурташ ок лий манын тудлан увертареныт гынат, сумкашкыже моло арвер да кочкыш дене пырля тудо телефонымат шылтен пуртынеже ыле, но кучалтын. Телефонжым конфисковатленыт, свиданийыш колтен огытыл.
Тидын шотышто административный правонарушений нерген протоколым возеныт. Ӱдырамашлан 20 тӱжем теҥге гыч 50 тӱжем теҥге марте штрафым тӱлыктен кертыт.
Марий Элысе УФСИН-ын пресс-службыжын фотожо.