Марий Турек посёлкышто илыше да тысе «Радуга» йочасадыште воспитательлан пашам ыштыше чолга марий ӱдырамаш Ольга Ендылетова пеледышым кушташ йӧрата. Пелашыж дене коктын кудывечыштышт моторлыкым ыштеныт. Тыште кажне лукшо чевер да чатка.
– Тӱрлӧ пеледыш моторлыкшо дене кажне еҥым куандара. Но нуным кушташ шуко пашам ыштыман: черлана гын, эмлыман, вашке ылыжше, сай лектышым пуыжо манын, ӱяҥдыман…
– Пеледышым ончымаш мылам куаным конда. Тӱрлӧ кушкылым кушташ изи годсек йӧратем. Авамлан георгиным, астрам, гладиолусым шындаш эреак полшенам. Вара 1 сентябрьыште шӱжарем дене коктын, кугу аршашым поген, школыш куанен вашкенна, аршашнам туныктышыланна кучыктенна.
Йоча годсек кидпашалан кумылан улам. Станислав пелашемат тыгаяк. 14 ий ончыч посёлкышто пӧртым налынна. Тунамак сурт-печынам тӱрлӧ семын сӧрастараш тӱҥаынна. Пелашемын кидше чыла пашалан толеш. Пу гыч моторлыкым поснак чаплым шочыктен мошта. Ешыштына чыла сомылым пырля ыштена, йоча-влакымат пашашке ушена. Чодыраш каен, мутлан, кийыше кадыр пушенгым ужына да мӧҥгӧ кондена. Тыгай пушеҥге гыч пелашем лӱҥгалтышым ыштен, моткоч моторын да оҥайын коеш.
кудевечыштына кузе вӱдйогыным ышташ манын, 10 ий наре шоненна. Тӱрлӧ форман кӱ тидлан лачеш лийын.
Сурт-печынам сӧрастарымаште тӱрлӧ сайтыште идейым налына. А ышташ тӱҥалме годым шке семынна чыла келыштарена.
– Могай тӱрлӧ кушкылым куштеда?
– Моткоч шуко, шотлен омыл, иктаж 30 сорт уло, очыни. Пеледыш-влак шошо гыч шыже марте ваш алмаштен пеледыт. Шошым ик пеледышым шындем, ик жап гыч воктеныже вес кушкыл лектеш. Тунам угыч кусарен шындылам. Сад-пакчаштына саскан пушеҥге шуко. Эҥыжвондым, шоптырвондым, агытанорам, кӱсевондым, виноградым, шемэҥыжвондым куштена.
– Йӧратыме пеледышда уло?
– Кажныже мотор. Шке жапыштыже георгиным, астрым, гладиолусым йӧратем ыле. Нуным кажне ийын, кӱнчен, телылан кораҥдыман, адакшым георгин шуко верым айла, сандене кызыт нине пеледыш-влакым ом кушто. Лилий, гортензий, хризантеме чот келшат.
– Кажне кушкылым ончен моштыман, ӱяҥдышат ойыртемалтеш докан. Пакчаштыда эн нечке кушкыл могай уло?
– Нечке пеледышым ом шынде. Утларакшым шукияш кушкыл улыт. Такшым нарынче плетистый розам кум ала ныл гана шынденам. Нелын илана. Тений икымше гана пеледын. «Эрвел» урлык лилийым ончен моштыман. Телым ынже кылме манын, чот тыршыман.
– Кушкыл-влаклан телым илен лекташ кузе полшеда?
– Шыжым пеледыш-влакым тӱредам, пушкыдо авыртыш але лӱс дене леведам. Вара лум вочмеке, ӱмбакыже эше лумым шукырак кышкем.
– Сад-пакчадам могай кушкыл дене эше сӧрастараш шонеда?
– Ремонтатный эҥыжвондым, нарынче пеледышан форзиций вондерым шындынем.
Ольга Ендылетова сад-пакчажым йӧратен, чон шокшыжым пыштен куча. Мотор пеледышыже-влакым ончен, кумыл нӧлтеш, вий погына. Тидын дене газетнан подписчикше-шамычат келшат. Шукерте огыл редакцийнан эртарыме «Мыйын кеҥежымсе кудывечем, сад-пакчам» фотоконкурсышто лачак О.Ендылетован колтымо фотожо-влак эн шуко лайкым погеныт.