Марий Элым Вуйлатыше Юрий Зайцев ЖКХ пашаеҥ-влакым саламлен да отрасльым вияҥдыме шотышто ойлен.
Йошкар-Олаште Я.Эшпай лӱмеш Марий кугыжаныш филармонийыште Торговльо, быт обслуживаний да ЖКХ пашаеҥ-влакын кечыштлан пӧлеклалтше погынымаш лийын.
Марий Элым Вуйлатыше ЖКХ регионыштына йӧнан илышын негызшылан шотлтеш манын. Тиде моткоч кугу инфраструктур, тушто 8,5 тӱжем шуко пачеран пӧрт, тӱжем дене километрыш шуйнышо инженерный сеть да шӱдӧ дене котельный улыт. ЖКХ комплексыш 35 теплоснабжений да 53 водоснабжений ден водоотведений организаций-влак, 105 управляющий компаний, 220 ТСЖ да моло структурат пурат.
Юрий Зайцев палемден: коммунальный услугым пуымо сомылым саемдыме йодышым власть эре терген шога, а тудым уэмдыме паша системе почеш шукталтеш. Вуйлатыше примерлан 2025 ийым конден. Теве Козьмодемьянскыште да Морко районышто вӱдым пуышо объект-влакым ачалыме да чоҥымо, тыгак Йошкар-Олаште да Килемар округышто водоотведений объект-влакым тӧрлымӧ. Тыге 148 тӱжем еҥлан услугын качествыжым саемдыме. Вич котельныйым газыш кусарыме, кок у блочно-модульный объектым чоҥымо. Тыгак «Инфраструктура для жизни» нацпроект почеш сеть-влакым уэмдаш тӱҥалме.
Мучашлан Марий Элым Вуйлатыше ЖКХ сферысе пашаеҥ-шамычлан наградым кучыктен.