«Марий кеҥеж «Движение первых толкын дене пырля» кудывечысе келыштарыме площадкылаште кеҥежым оҥайын да пайдалын эртараш лиеш.
Ты фестиваль кышкарыште «Движение первых» толкынын командыже-шамыч шочмо-кушмо кундемыштак жапым эртарыше ӱдыр-рвезе-влаклан тӱрлӧ программым ямдыленыт. Тыге кажне йоча площадкылаште шканже келшыше занятийым муын кертеш.
Тыге, мутлан, Волжск оласе экологический лицейын юннатше-влак кудывечыштак походым организоватленыт. Тидлан палаткым шогалтеныт да кузе лӱдыкшыдымын да пайдалын путешествоватлыман каласкаленыт.
А Козьмодемьянск оласе лицей верысе кудывечым олимпийский ялыш савырен. Тушто тӱрлӧ ийготан ӱдыр-рвезе-шамыч таҥасеныт, вийыштым тергеныт.
Морко район Эҥерсола школышто весела куштымаш ден спорт модмаш-влак эртаралтыныт гын, Кужэҥер округысо Йӱледӱр школышто «Тый, мый, ме тый денет» кандыра курс лийын. Тунемше-шамычлан тӱрлӧ ӱчашымашым эртареныт.
Медведево район Знаменский школын тунемшыже-шамыч шке кидкопашт гыч ойыртемалтше плакатым ыштеныт. Кажне кидкопа порылыкын, чон-шокшын, тургыжланымашым радамлен. Тудын дене ӱдыр-рвезе-шамыч кажне еҥ дене пайлалташ ямде улмыштым ончыктеныт.
Марий Турек район Косолап селасе школышто асфальтысе сӱрет конкурсым эртареныт. Кугу тӱткыш коллектив дене ыштыме сӱретлан лийын. Тунемше-шамыч «Лето с Первыми» кугу картиным сӧрастареныт. Тушко кажне участник шке надыржым пыштен. Тыге сӱрет илыше да ямле лектын.
Советский район Алексеевский школын площадкыштыже «Фольклорные весёлые старты» таҥасымаш лийын. Ӱдыр-рвезе-влак калык йӱлам палымыштым, писе да тале улмыштым ончыктеныт.
Шернур округысо Зашижемье школын тунемшыже-шамыч «Вышибалы модмаш гоч вашла кылым муаш тунемыныт гын, Килемар посёлкысо Йоча-влак усталык рӱдерыште писе модыш-влак дене модыныт.
Тыгай мероприятий-шамыч тунемше-влаклан сай кумылым веле огыл, тыгак ятыр жаплан шарнымашеш кодшо татым пӧлеклат. Вет кажне таҥасымаш, ӱчашымаш пайдалын да веселан эртаралтын.