Морко район Токпердино ялыште илыше Анастасия Ермолаевна шке фамилийже нерген каласкала:
– Пайбулатов фамилий – Владимир Павлович пелашемын. Тудын ачаже Павел Пайбулатовичын каласкалымыж почеш, ялна олмыш эн ончыч Токперде кугыза толын. Тудын кум эргыже лийын: Шаблат, Шабрук, Савлий. Савлийын Пайблат эргыж деч Пайбулатов фамилийна лектын. Пайблатын Пайгаш (Павел) эргыже – Володя пелашемын ачаже.
Володян кум шольыжо: Геннадий, Савлий, Валерий – улыт. Геннадий Тюмень областьысе Созоново селаште ила, ӱдыр ден эргыжат туштак тукымым шуят. Савлий (кок ӱдырышт уло) Морко район Нуж-Ключаште ила, Валерий Чопакыште лакемын, тудынат кок эргыже тукымым шуят. Володя ден коктын вич икшывым шочыктенна: Юра, Людмила, Ярослав, Валентин, Святослав. Чаманен каласыман, кок эргынан ӱмырышт кӱчык лийын.