«Могай сылне верыште те иледа» манын, ялышкына толшо-влак деч ятыр гана колалтын. Чынжымак, Морко районын ик мотор лукыштыжо верланен ик уреман Ердӱр ял: ер воктене, лишнак – поҥгылан да емыжлан поян чодыра, курык, пасуат – тыштак.
233 ий ончыч
Ердӱр яллан 1793 ийыште негызым пыштыме, тунам 13 суртым шотленыт. 1935 ийыште «Кугу ер» сельхозартельым чоҥымо, вуйлаташ И.А.Александровым шогалтыме. Еҥ-влак уло мланде пашам имне дене ыштеныт. 1943 ийыште тӱҥалтыш школ почылтын.
Паша тургымым Кугу Отечественный сар кӱрлын. Ял гыч 36 пӧръеҥ Шочмо элым аралаш каен, 18 еҥ веле мӧҥгеш пӧртылын. 1950-ше ийлаште Ердӱр калык карьер пашаш ушнен, ялозанлык пашамат шуктен. 1960-шо ийлаште «Рассвет» колхозышто тыршаш тӱҥалыныт.
27 июньышто Ердӱрыштӧ эртыше ял пайрем шуко еҥым иквереш чумырен. Икте тыштак шочын-кушкын да пиалжым тиде ялыштак вашлийын, весын, ынде ятыр ий тора кундемыште ила гынат, чарайола куржталме ямле йоча пагытше тыште эртен, кумшын коча-коваже тышеч улыт, нунынат изи годсо жап нерген шарнымаш тиде вер дене кылдалтын. Ты кечын родо-тукым, йоча годсо йолташ, уна-влак дене вашлийын кутыралташ, эртыше пагытым шарналташ кажнылан куанле ыле.
Мероприятийым вӱдаш Морко районысо рӱдераҥдыме клуб системе директорын инновационно-методический паша шотышто алмаштышыже Л.Ф.Кирилловалан ӱшаненыт. Ялын историйжым шергалыныт, Кугу Отечественый сарыште, специальный военный операцийыште вуйым пыштыше-шамычым ик минут шып шоген шарналтеныт.
Ялын эн кугу ийготан еҥже – 85 ияш Гурий Иванович Васильев, а эн изижлан эше пел ий гына темын – нунымат саламлыде коден огытыл. Шуко шочшан, самырык еш-влакымат, тыгак ятыр ий пырля илыше мужыр-шамычымат: шукерте огыл шӧртньӧ сӱаным палемдыше да икмыняр ий гыч тыгаяк еш пайремлан ямдылалтше вате-марий-влакымат – каласен кодышт.
Ердӱр вате-влак тутло чесым ямдыленыт да, поян ӱстелым поген, пайремыш толшо-влакым сийленыт. Йоча-шамычланат йокрок лийын огыл – нунылан организатор-влак тӱрлӧ оҥай модышым эртареныт.
А пайремым сӧрастареныт «Шуматкече» ансамбль (тудын ик чолга еҥже – Ердӱр ялынак шочшыжо Руслан Никифоров), мурызо Алина Семёнова, Йошкар-Ола гыч «Марий мланде» фольклор ансамбль, Шайра кундем гыч артист-влак.
Чоным вӱчкышӧ да кумылым нӧлтышӧ пайрем эртен каен, а ты кече нерген поро шарнымаш тушко толшо кажне еҥын чоныштыжо эше кужу жап илаш тӱҥалеш. «О, шочмо ял, пелед, тӱзлане!» манын тыланыме шуэш Ердӱр яллан, вет мыят тыште шочын-кушкынам да кажне гана тушко шӱм вургыжын вашкем.
Авторын фотожо-влак.