Тиде фотом куреш кучедалмашым уло чонжо дене йӧратыше, кеч 60 ийым темен гынат, Лапкашор марий Станислав Иликаев ыштен.
12 июньышто Пошкырт кундем Илиш районышто Сабантуй лие. Пайремым сӧрастарыше эн оҥай таҥасымаш – тиде куреш, шовыч дене кучедалмаш. Снимкыште, пурлаште, вачӱмбакыже ош тагам нӧлтал пыштыше рвезе – тиде Красный Октябрь ял гыч Денис Гареев. Тудо 85 кг марте нелытан-влак коклаште сеҥышыш лектын, «Сабантуй патыр» чап лӱмым сулен налын.
Коло кок ияш Денис – куреш дене спорт мастерыш кандидат. Ты лӱмым эше Верхнеяркеево селасе Башкир аграрно-технологический колледжыште тунеммыж годымак сулен. Тунам тудо шке ийготан да нелытан рвезе-влак коклаште Уфа оласе турнирыште «Башкортостанын чемпионжо» да Озаҥ олаште «Татарстанын чемпионжо» лӱмым сеҥен налын. Тыгак Россий кӱкшытыштӧ эртаралтше таҥасымаште кумшо лийын. Денисын тӱрлӧ танасымаш гыч 50 медальже уло.
Ешараш кӱлеш, 13 июньышто Старокуктово ял шотан илемыште эртаралтше пайремыштат «Сабантуй патыр» лӱмжым эше ик гана пеҥгыдемден, мӧҥгыжӧ шем тагамат налын каен.
Денис ешан, Нефтекамск олаште илат. Йӱдвелне вахте йӧн дене пашам ышта.
Ача-аважын, коча-кован куанышкышт уло Красный Октябрь калыкат ушна, тудын дене кугешна, у сеҥымашым тылана.
Филипп Байтуков.
Пошкырт кундем, Илиш район.