Вӱдыжгылык шукылан кӧра тенийысе кеҥеж пакчасаскалан путырак поян. Сандене пакча сомылым йӧратыше да садовод-влаклан куан дене пырля пеш шуко пашам конден.
Снегым, мӧрым але поген пытарыме огыл, эҥыж лыҥак кӱын, шке вондыжым мланде марте таен кержалтын. Морко марий манмыла, тудо тений пеш «тале». Йошкар ден ош шоптыр, «мемнам ончычрак поген налман» маншыла, йӱр чӱчалтыш дене варналт йолгалтын, шкешт деке чотак «ӱжыт». Пеш шуко крыжовник шемалге кӱрен-кандалге тӱсышт дене мландывак пуйто ноен пытен каналташ «возыныт». Шемшоптыржо… тений тич. Но нуным ончен, ала-молан чон пешыже ок куане. Пеш жал, шукыжо тений погыдеак, кошкен, йоген йомеш. Олма, ала мом тӧчен, орлаҥгылаш шукак чумырген. Кажне кечын нуно нелемын, укшлаштым ӱлыкӧ шупшыт. Нуным от чаракле гын, тевак укш тодылалтеш. Облепихе дене тыгаяк сӱрет. Нуныштын саскашт орышо семын ӱмбала-ӱмбала кушкыныт. Кияр чот лектын. Кажне кечын погыман. Икте куандара, тений йыраҥыш вӱдым шавыман огыл. Помидор але ужарге, но сай лектышым сӧра. Тудым кидыш налын, пеле гыч пӱчкын, шинчалым шавалтен, шем кинде дене пурлалме татым кажныже вуча.
Пареҥге мастар-влакын эр шушо сорт саскам шынден, кӱлеш технологийым кучылтын куштымо пареҥгышт шуын. Тудым Йошкар-Олаште лӱмынак келыштарыме ужалыме верлаште ужаш лиеш. Кодшо кечылаште мый Пролетарский, Йошкар Армий да Бауман уремласе ужалкалыме тыгай верлаште лийым. Продукций ассортимент кызытсе жаплан келшен толшо. Пакчасаска гыч шоганшудо, шоган, чеснок (тудо але нӧргырак, но пеш тамле) кинза, укроп, сельдерей да молат койыт.
Теве Йошкар-Оласе аэропорт деч тора огыл верланыше Юркан ялыште илыше тошто палымем Татьяна Павлова чапле эр шушо ковышта дене пеледыш-ковыштам конден. Тылеч посна тудын прилавке ӱмбалныже тазалыклан пайдале реве, йошкарушмен, шоптыр, пареҥге да молат улыт. Шке ялыштыже тудо ик эн тале пакчазылан шотлалтеш. Татьянан шуко тӱрлӧ культуран йыраҥже-шамыч эн мотор улыт.
Гомзово микрорайонысо «Перекрёсток» ужалыме рӱдер воктенысе ужалыме верыште тӱҥ шотышто тыгаяк сӱрет. Тыште модо, рывыжвоҥго да пеледыш-влак шукырак улыт ыле. Тыште Медведево посёлко гыч шукертсек палыме кугу опытан агроном Эльвира Пироговам вашлийым. Тудо шке 30 сотко мландыштыже мом гына огеш ӱдӧ, мом гына ок кушто! Тудым 4 шагат эрдене ужнет гын, пакчашкыже ончал. 21 шагат кастене ужнет – адакат пакчашкыже ошкыл. Кечывалым гын ӱдырамаш пакчасакам ужалкала. Сатум налше кокла гыч шукынжо Э.Пироговам палат, садлан лач ты садоводын продукцийжым налыт. «Кочкаш шолташат жапем шагал, садлан мый шукыж годым пакчасаска, кушкыл гыч салатым ыштем. Тидлан кӧра шкемым пеш сайын, куштылгын шижам да сайын малем. Адакшым тиде кочкыш организмыште улшо уто сакырым иземдаш полша», – манеш уста пакчазе.
Иван Речкин.
Авторын фотожо-влак.