Эртыше кечылаште Уфа олаште педиатрий дене III всероссийский олимпиаде эртаралтын. Тушко элнан эн тале студент-медикше-влак ушненыт. Марий кугыжаныш университетысе Медицинский институтышто тунемше вич ӱдырат олимпиадыште шинчымашыжым терген. Тӱшка зачётышто командышт нылымше верыш лектын, а «Маленький вкусный секрет» спецконкурсышто ӱдыр-влак икымше верым налыныт.
Ты команде гыч ик ӱдыр Ирина Иванова дене палымым ыштена.
Школ годсо шонымаш
Ирина – Морко посёлко гыч. Тысе 1-ше номеран школышто тунемын, 9-ше классыш коштмыж годым медицинылан шӱмаҥын.
– Еҥ-влаклан полшаш изинек келшен. Вара анатомийым келгынрак шымлаш тӱҥалынам да тыге Мединститутыш тунемаш пураш шонен пыштенам. Шарнем, 10-шо классыште улмына годым школышкына Марий кугыжаныш университет гыч толыныт да ты тунемме тӧнеж, студент илыш нерген каласкаленыт. Тылеч вара мыят тушко тунемаш пураш кумылаҥынам. Ача-авам дене Йошкар-Олаш лӱмын толын коштынна, мо-кузежым умылкаленна. Лач тудо кече деч вара МарГУ-ш тунемаш пураш пеҥгыдын шонен пыштенам, – каласкала И.Иванова.
Иринамытын ешыштышт врач-влак уке улыт, тукымыштышт ты профессийыш корным почшо тудо икымше еҥ. Йоча-влакым йӧрата, тидыже – аваж деч, очыни (ӱдырын аваже – воспитатель), садлан педиатрийым ойырен налын.
Эре тунемман
Кызыт И.Иванова – нылымше курсын студенткыже. Тунемаш шуко логалеш гынат, студактивын эртарыме чыла гаяк мероприятийыш кумылын ушна. Садлан йолташыже ятыр, да йокрокланаш огыт ярсе.
– Эн нелыже – тынар шуко информацийым шарнен кодаш, тунемаш да тыгодым еш, йолташ-шамыч дене пырля лияш жапым муаш. Студент-медик лияш моткоч неле, но мыланем ешем чот полша. Тиде кумылым нӧлта да вийым пуа, – манеш студентке.
Кугурак курслаште тунемше ӱдыр-рвезе-шамычым ончен, тӱрлӧ олимпиадыште шинчымашым тергаш Ирина Иванова ӱмаштак шонен ыле. Ынде шонымыжо шукталтын.
– Олимпиадыште участвоватлыме – тиде опыт, ончыкыжым тунеммаштат, пашаштат кӱлеш лиеш. Вес ганат, йӧн лиеш гын, уло кумылын ушнем, – ойла студентке.
Специалитет деч вара ӱдыр ординатурыш тунемаш пураш шона. Садлан кызытеш Ирина уло жапшым тунеммылан пӧлекла, йӧн лектешат, мӧҥгыжӧ миен толеш.
И.Иванован альбомжо гыч налме фото.