6 майыште Йошкар-Оласе калык-прикладной сымыктыш тоштерыште «Путь к свету» ончер почылтын.
Тушто Марий Элысе тӱвыран сулло пашаеҥже, Олык Ипай лӱмеш кугыжаныш молодёжный премийын лауреатше Мария Клюкинан графикыж дене палымым ыштат. Нуным православный шнуй-шамычын образышт, Иван Шмелёвын «Лето Господне» романже гыч иллюстраций-влак, Марий Элысе храм-шамыч экспозицийлан шеледыме.
Ончерыш акварель, гуашь, флористике да варналтше технике почеш сӱретлыме картине-влакым чумырымо. Тылеч посна Юрий Петрович Клюкинын книгаже да тусо герой-шамычын иллюстрацийышт лийыт. Нуно графикын, педагогын 80 ияш лӱмгечыжлан пӧлеклалтыт да уста ешын: ачаж ден ӱдыржын – пашаштым радамлат.