Йошкар-Олаште кожно-венерологический диспансерым капитально олмыктеныт.
Марий Элым Вуйлатыше Юрий Зайцев ты зданийым ачалыме деч вара ончен лектын, модернизаций программе дене налме у медицине оборудованийла дене палыме лийын.
– План почеш Марий Элысе медицине тӧнежлам ачалымаш пырдыжым гына уэмдымаш огыл, а тиде кажне черлыеҥын жапше да тазалыкшылан инвестицийым пыштымаш. Ме черет шагалемже да кӱлеш медицине полышым писынрак налаш лийже манын, чылажымат ышташ тыршена. Шонымашна – медицине тӧнежыш мийыше республикысе кажне еҥ кызытсе стандартлан келшыше кӱкшӧ квалификациян полышым жапыштыже налын кертшаш.
Диспансерым 2023-2025 ийлаште республикысе бюджет кӱшеш ачалыме. Тидлан оксам ойырымо шотышто пунчалым Марий Элым Вуйлатыше Юрий Зайцев 2023 ийыште луктын. Чумыржо 70 млн утла теҥге каен.
Леведышым ачалыме, конструкций-влакым кӱртньӧ дене пеҥгыдемдыме, чыла окнам, кӱварым вашталтыме, инженерный коммуникацийым, пырдыжым да фасадым уэмдыме. Тыгак у мебель ден оборудованийым налме.
Диспансерыште стационар-влак сутка мучко приёмым эртараш тӱҥалыт. Тыште кызыт 15 врач пашам ышта, тышеч латкокытшо дерматовенеролог улыт.
