Тыгай годым пушеҥгылан кузе полшыман? Тидын нерген «Сад Мари» кушкыл-влак питомникым вуйлатыше Михаил Иванович Рябинин умылтара.
Жапым шуйкалыде
Шошо шуын, но сад эше мала. Тений лум шуко лумын, тидыже коля-влаклан келша веле, келге лум йымалне нуно озаланат. Сад-пакчазе-шамыч колям пытараш пешыже огыт толаше (ядохимикат дене обрабатыватлыман, капканым шындылман,
лӱдыктышӧ веществам кучылтман). Садлан тиде кугу йоҥылыш.
Шошым лум шулаш тӱҥалмеке, лум йымалне улшо укш-влак шулен лектытат, саскам пуышо пушеҥгылаште да вондерлаште коля нултымо палым ужаш лиеш: кушто ик ужашым, а кушто лум келгыт мучкат. Тыгай годым садпакчазылан, жапым шуйкалыде, кушкылым арален налаш пижман. Тидыжым коштышо мардеж пуаш тӱҥалме марте ышташ тыршыман.
Ятыр сад-пакчазе ден специалист-влак, пушеҥгым коля нултымо деч вара утараш манын, «мостикан» манме прививкым ышташ але шуным, садовый варым да моло препаратым йыгаш темлат. Но тыгай прививкым ышташ опытан специалист лийман. Тыглай садпакчазе
тидым шот дене ыштен ок керт, да пушеҥге кошка.
Шуным йыгаш сай, но тудымат чын ыштыман, да тиде неле паша. Адакшым кушто тудым эр шошым муаш?
Эн сай да пайдале йӧн
Питомникыштына саскам пуышо пушеҥгым коля нултымо деч вара аралаш куштылго да пайдале йӧным кучылтына. Тидлан тыглай садовый полиэтилен плёнко кӱлеш. Туддене мом ыштыман?
Пушеҥге воктене лумым кораҥдыман, уто укшлам пӱчкедыман. Плёнкым тӱрлӧ лопкытаным да кужытаным пӱчкедыман да рулоныш пӱтырыман. Пушеҥге тӱҥ мыняр кӱжгырак, полоско тунар лопкарак лийшаш: 2 гыч 5-8 см марте.
Пушеҥге тӱҥыш мланде деке лишкырак плёнкым кылдыман да кӱшкыла йыр пеҥгыдын пӱтырен кӱзыман, ик савыртыш (виток) весе
ӱмбак изишак вочшаш. Эре ӱлыч кӱшкыла пӱтырыман, тыге кӧргышкӧ йӱр вӱд огеш пуро.
Коля нултымо вер деч изиш кӱшнырак пӱтырен чарныман да кылден шындыман. Но пӱтыралтыш тӱҥалтыште да мучаште эше шпагат дене кылдаш сайрак, тыге мардеж рончен огеш керт.
Шке семын уэмдалтеш
Полиэтилен плёнко эмганыше лончым кошкымо деч арала, да тудын йымалне у ткань шочеш, тыге пушеҥге шке семын паремеш. Пушеҥгым эмлаш тетла нимом ыштыман огыл. Пӱтырымӧ плёнкыш да пушеҥге тӱҥын таза ужашышкыже садовый побелкым йыгаш лиеш.
Плёнкым кок-кум тылзе гыч, июль кыдалнырак, кораҥдыман. Тидым пылан игечыште ыштыман. Ты жапыште пушеҥге шӱм уэмдалтеш. Плёнкым уто жапымат кучыман огыл, вет пушеҥгын эмганыше ужашыже уремысе температурлан тунем шушаш, телылан ямде лийшаш.
Тыге эмлымеке, коля нултымо пушеҥге тиде ийынак саскам пуэн кертеш, но саскам лучо кораҥдаш, икмыняржым веле кодаш. Шошым органический да комплексный минеральный ӱяҥдышым пуыман да кукшо игече шогымо годым арнялан кок-кум гана вӱдым оптыман.
Питомникын архивше гыч налме фото-влак.