Шымше «ФормАРТ» стартым налеш: граффити Российысе калык-влакын тыныслыкышт да икоян улмышт верч!
«ФормАРТ» фестиваль округыштына 2020 ий гыч Россий Президентын Юл кундем федеральный округыштыжо полномочный представитель Игорь Комаровын инициативыж почеш эртаралтеш. Тудын цельже – уремысе сымыктышым вияҥдымаш, самырык талант-влаклан полшымаш да нуным олам моторракым ыштымашке кумылаҥдаш.
Самырык сӱретче-влаклан вич тематический направлений дене граффити эскизым ышташ темлалтеш:
«Россий калык-влакын илышышт икгай ритмыште» – тӱрлӧ национальностян еҥ-влакын кажне кечысе образышт;
«Йӱла-влак ушат» – национальный йӱла, пайрем да ремесла-влак;
«Общий миссий» – келшен пашам ыштыме, волонтёрство да служений гоч пырля лиймаш;
«Тукым-влак коклаште вашкыл» – калык поянлыкым да опытым кушкын толшо тукымлан пуэн кодымаш;
«Россий – мемнан чыланан суртна» – тӱрлӧ культурым иктыш ушышо эл.
Конкурсыш Юл кундем федеральный округышто илыше 18 гыч 35 ияш марте профессионал ден любитель-влак ушнен кертыт.
Ушнаш манын, тений 3 май марте проектын сайтыштыже (formartpfo.ru) йодмашым колтыман. Тушко конкурс пашан эскизшым пижыктыман (ик участник деч кум йодмаш деч шукырак лийшаш огыл).
Фестиваль кум этап дене эрта
икымше этапыште эксперт-влак ПФО-со кажне 14 регионышто сай эскиз-влакым ойырат;
презентационный этапыште финалист-влак шке олаштышт граффити пашам ыштат, тудым фото- да видеосъёмко гоч ончыктат;
финалыште паша ден ролик-влакым сайтышке вераҥдат да нунын верч йӱклымаш эрташ тӱҥалеш.
Иктешлымашым Кировышто ыштат. Сеҥыше-влак диплом, шарнымашан знак да окса грант дене (200 000, 150 000 да 100 000 теҥге) палемдалтыт.