6 мартыште Йошкар-Олаште Сеҥымашын ХХХ идалыкше лӱмеш тӱвыра полатыште «А ну-ка, ӱдыр-влак!» республикысе II конкурсын финалже лийын.
56 ий ончыч эртаралташ тӱҥалше ты конкурс программе ондак Совет Ушемын эн мотор ӱдыржӧ-влак коклаште уш-акылым тергыме да спорт таҥасымаш семын лийын. Тунам ӱдыр-влак куржталмаште, велосипед дене кудалыштмаште, куштымаште шкеныштым ончыктеныт, кушкылым куштымаште шинчымашыштым тергеныт, Моско мучко экскурсийымат эртареныт.
Тений «А ну-ка, девушки!» конкурс Российысе калык-влакын икоян улмо идалыклан пӧлеклалтын. Финалыш Марий Элысе районла да олала гыч 16 эн-энже толыныт. Икте йочасадыште пашам ышта, весе тӱвыра пӧртыштӧ тырша, кумшо – туныктымо программын кураторжо, весе книгагудо але тоштер пашаеҥ.
Икымше конкурс «Мый да мыйын профессием» маналтын. Ӱдыр-влак шкешт да профессийышт нерген палдараш тӱрлӧ йӧным кучылтыныт. Теве, мутлан, Марий Турек район гыч Александра Семёнова оҥай видеом ямдылен да коллегыже-влак дене пырля балетымат ончыктен. Ну, воштылтышт вет! У Торъял район гыч Эвелина Белова ден коллегыже-влак тӱвыра пашаеҥ-шамычын куштылго огыл сомылышт нерген гимнымат йоҥгалтареныт. А Волжский район гыч Анна Иванова йочасадыште музыкальный вуйлатышылан пашам ышта, тудо тӱрлӧ калык коклаште кылым ыштымаште мурын, семын вийыштым палемдыш. Куандарыш, марий тувырым чиен, шочмо йылме дене выступатлышат ыльыч.
«Шочмо элем — Россий» кокымшо конкурсышто ӱдыр-влак Шочмо элым аралыше родышт, землякышт дене палдареныт. Кугу Отечественный сарыште кредалше кочашт нерген каласкаленыт. Кызыт специальный военный операцийыште элна верч шогышо ачашт нерген икмыняр участник чон вургыжын каласкалыш. Ӱдыр-шамычын СВО-што геройла вуйым пыштыше родышт, землякышт нерген ойлымыштым, кынел шогалын, шинчавӱд йӧре колыштна.
«Усталыкын уке мучаш» кумшо конкурс эше ик гана пеҥгыдемдыш: чынжымак, ӱдыр-влакын усталыкышт тӱрлӧ шӧрынан да мучашдыме. Ме, ончышо-влак, руш да марий муро-влакым колыштна, кӱсле сем почеш курыкмарий куштымашым ончышна, ӱдырым марлан пуымо йӱла денат палыме лийна, гармонь почеш марий такмак-влакым йоҥгалтарымылан да куштымылан совым рӱж кырышна.
Марий Эл Республикысе Правительстве Председательын алмаштышыже – тӱвыра, печать да калык-влакын пашашт шотышто министр К.Ивановын вуйлатыме жюрин пашаже куштылго огыл ыле. Эн мотор, эн ушан, уста, кумылым савырыше 16 ӱдыр кокла гыч иктыжым посна ойыраш манаш веле. Туге гынат сеҥышын лӱмжӧ пале – «Профессионал» Гран-прим Параньга районын ӱдыржӧ, И.С.Палантай лӱмеш тӱвыра да сымыктыш колледжын студенткыже Карина Антроповалан пуымо. «А ну-ка, ӱдыр-влак!» I конкурсын сеҥышыже Татьяна Галкина Кариналан марий сӧрастарышым оҥышкыжо сакен, а Константин Иванов марий тӱран мотор шовычым вачышкыже пыштен.
– Конкурс этап-влаклан кыртмен ямдылалтынам. Тыгодым сценыш мом чиен лекмылан веле огыл, кӧргӧ чонланат тӱткышым ойыраш тыршенам, сценыш волгыдо кумыл дене, шыргыжын лекман – вет ончаш толшо-шамыч чыла ужыт-шижыт. Конешне, тургыжланымаш деч нигуш от шыл. Адакшым моло участник-шамыч моткоч мастар, уста улыт. Тыгай ӱдыр-шамыч дене ик сценыште шогаш – чап.
Конкурс ик шӱлыш дене эртен кайыш. Сеҥышым увертарымышт годым шке лӱмем колмеке, ончыч ӱшанен кертын омыл, шинчавӱдемат толын. Ешемлан, йолташем-шамычлан, мыланем полшен шогышо кажне еҥлан тауштем, – манеш К.Антропова.
Кажне участникым посна номинацийыште палемденыт, садлан ик ӱдырат мӧҥгыжӧ пӧлек деч посна каен огыл. А тылеч ончыч республикысе калык усталык рӱдерын ВК-се группыштыжо йӱклымашым эртареныт ыле. Эн шуко йӱкым Марий Турек район гыч Александра Семёновалан пуэныт.
Ныл шагат наре шуйнышо конкурсын мучашыжым южо еҥ вучен шуктыде каен. Нунымат умылаш лиеш – ноеныт, но вес могырым, кунам эше тынар мотор ӱдырым ик сценыште ужат?!
И.Речкинын фотожо-влак.