Шукерте огыл Морко район Кораксола тӱвыра пӧрт пеленысе «Муро кумыл» фольклор ансамбльна воктен верланыше изи Ярансола ялыш миен коштын.
Ме кажне кеҥежым могай-гынат изи ялышке миен, мероприятийым эртарышаш улына. Тидыжым районыштына кажне тӱвыра пӧрт деч йодыт. Пайремна Россий калык-влакын икоян улмо идалыклан пӧлеклалтын. «Икоян калык – икоян еш» район кӱкшытан фестиваль-таҥасымашын кышкарыштыже эртен.
Пайремыштына пырля мурен-куштенна, тӱрлӧ йылме дене кутырышо калыкын келшен илымыжым поснак палемден кодаш тыршенна. Марий, руш муро-влак йоҥгышт, татар куштымаш чонешна сай кышам кодыш. Шӱргыял школын тунемшыже Надежда Сергеева шке серыме «Тыныс верч» почеламутшым йоҥгалтарыш. А Ярансола ялын эн чолга эргыже Тимофей Новиков «Шочмо ял» почеламутшым лудо.
Пеш кугу тау ял калыклан мемнам порын вашлиймыжлан, кажне кеҥежым тыге вучен шогымыжлан.
Елена Григорьева, Кораксола тӱвыра пӧрт вуйлатыше.
Снимкыште: Пайрем годым.