Май мучаште Москошто Н.К.Мешко лӱмеш калык муро сымыктыш II Всероссийский конкурс эртаралтын. Йошкар-Ола гыч Риана Буаб шке ийготан-влак коклаште II степенян лауреат лийын.
Музыкым йӧратыше тукым
Риана Бауман лицейыште тунемеш, 4-ше классым пытарен. Уло яра жапшым ӱдыр музыклан ойыра – «Лира» йоча сымыктыш школышто фольклор отделенийыште шуаралтеш. 2022 ий гыч тусо «Узоры» мурышо да куштышо йоча образцовый ансамбль дене ятыр концертыште да конкурсышто мастарлыкшым ончыкта.
– Ешыштына музык тӱням йӧратыше-шамыч шагалын огытыл. Тукым кочам Кужэҥер посёлкысо музык школын директоржо лийын. Авамын шольыжо Константин Горбунов «Полярная звезда» группышто мурен. Авамат Советский посёлкысо музыкальный школыш фортепиано классыш шым ий коштын. Коча-ковам сайын мурат. Садлан мыят тиде корным ойыренам.
Кум ияшак мураш тӱҥалынам. Тӱнямбал, российысе, регионысо конкурслаш ушнем да ончыл верлаш лектам. Марла да рушла калык муро-влакым мурем, тыгак англичан да серб йылме-влак дене эстраде композиций-шамыч дене сценыште выступатлем. Эстраде да калык мурымаш занятийлаш преподавателем дек коштам, – манеш Риана.
Марла да рушла
Н.К.Мешко лӱмеш конкурсым А.Г.Шнитке лӱмеш Москосо кугыжаныш музык институт эртара. Тений тушко Российын 33 регионжо гыч 500 наре ӱдыр-рвезе ушнен. Рианам ты конкурслан калык сымыктыш школышто вокалым туныктышыжо, Марий Эл Республикысе тӱвыран сулло пашаеҥже Н.Захарова ямдылен.
Икымше турлан кок мурым мурыман ыле. Риана Алабуго марий-влакын рекрут мурыштым да «Чёрный ворон воду пил» (Омск кундемысе муро) муро-влакым мурен. Кокымшо турыш 20 еҥым гына ойыреныт. Тидлан эше кок мурым ямдылыман ыле. «Реченька-река» да Советский район марий-влакын шудым солымо годым «Олыкшат кумда» мурышт дене кокымшо турышто Риана 10 эн тале участник-влак радамыш логалын.
– Участник-влак пеш виян улыт ыле, Гнесинка музык школ гыч вокалист-шамычак мом шогат. Шерева почеш Риана 20-шо, пытартыш, выступатлен да конкурсым мучашлен. Тудо шкеже веле огыл, мыят чот тургыжланенам, – манеш Надежда Николаевна.
Ончылно – у проект, у сеҥымаш-влак
Риана лицейыште «нылытанлан» да «визытанлан» тунемеш, поснак алгебре, руш да англичан йылме-влак предметлам йӧрата. Тыгак сайын сӱретла. Бисер, резинке дене тӱрлӧ сӧрастарышым ыштылеш.
– Кажне кечын урок-влак деч вара музыкальный школыш коштам, туштыжо отличнице улам. Кас марте заниматлем да варажым мӧҥгӧ пашалан пижам. Каныш кечылаштат учебник-влак дене шинчылтам. Ноялтеш, но вуйым шиймаш уке, – ойла уста ӱдыр.
Кызыт Риана Москошто да Ульяновскышто лишыл жапыште эртаралтше эше кок проектлан ямдылалтеш. Конкурслаш лектын коштмо годым ешышт кок мераҥым иканаште покта, манаш лиеш: ты амал дене ешге тушко кудалыт да у вер-влакым ончен коштыт, пырля канат. Адакшым июнь мучаште ӱдырым эше ик куан событий вуча – конкурслаште сеҥымылан тений ӱдырлан Артек лагерьыш «Искусство создавать» сменыш путёвкым пуэныт.