Марий Эл гыч делегаций Липецкыште эртаралтше «Малая родина – сила России» регионысо форумыш ушнен. Тушто республикнам Йошкар-Олан вуйлатышыже Евгений Кузьмин, У Торъял округын вуйлатышыже Денис Таныгин, Кужэҥер районын вуйлатышыже Ольга Ярыгина ончыктеныт. Мероприятий элнан 70 регионжо гыч 500 наре еҥым чумырен.
Форумын тӱҥ темыже – районласе службышто у технологий-влаклан эҥертымаш. Участник-шамыч икмыняр кече тӱрлӧ лекцийыште да сессийыште шинчымашыштым нӧлтеныт. Тыгак пашаште у йӧным кучылтмо нерген каҥашеныт. Липецк областьыште медициныште, лӱдыкшыдымылык шотышто да коммунал озанлыкыште ИИ-м (Искусственный интеллект) илышыш шыҥдарымышт дене палыме лийыныт.
Муниципал службын пашажлан пӧлеклалтше форумын пытартыш мероприятийже-влак 26-27 мартыште Астраханьыште лийыт.