Ме кум ӱдыр кушкынна, кована ончен. Тудын шомакшым эре колыштынна. Шкеже изишак ончен моштен. Но мыланна нимомат ойлен огыл. Ача-аваналанат ончыкылык нерген ик шомакым пелештен огыл.
Кызыт умылем: вет ме, ӱдыр-ӱдырамаш-шамыч, эре тӱрлӧ йодышлан вашмутым муаш тыршена, кычалына, ала-мом пургедына. Уда ситуаций годымат лачак мужедмылан кугу ӱшан шочеш. Сандене еҥ-влак шукыж годым мужедше але юзо деке каят. Чыла гаяк ӱдыр-ӱдырамаш мужедын онча: можыч, иктыже – тыглаяк, весыже – лӱмынак. Мужедыт пӧръеҥ-влакат, бизнес-леди да марлан кайыме деч ончыч самырык ӱдыр-шамычат.
11-ше классыште тунеммем годым ӱдыр-шамыч мемнан суртыш мужедаш погыненна ыле. Воштончыш дене ончыкылыкнам палаш шонен, колышо айдеме-влакын лӱмыштым ойленна. Ковам ала-кушеч толын лекте да мыйым шкеж деке ӱжын наҥгайыш. «Чарныза тыге мужедмыдам» манын, кӱштенак ойлыш. Тунам полко гыч кӱжгӧ книгам налын, кидышкем кучыктыш. «Теве тыге мужедса» мане.
Тора кундемыш тунемаш каяш шонымашем ыле. А тушто мӧҥгеш савырнен толмо нерген ойлалтын. Тидлан шым ӱшане, шке шонымашем ыштышым. Тыгак лие: авам нелын черланыш, ачам телеграммым колтыш. Шкенан вузыш тунемаш куснышым, авам ончаш полшышым. Ковамже, тидым шижын, торашке пеш ынеж колто ыле.
Ик жап гыч ковам деч марлан кайыме шотышто йодын ончышым, «Адак мужедаш мо?» манынат пелештышым. Тунам ковам вашештыш: «Тетла ит мужед, илышетым шке чоҥо, тудым весылан савыркалаш йӧным ит пу. Вий-куатетым кӧргыштет муат гын, чылажат шотлан толеш».
Ковамын ойлен кодымо шомакшым шарналтем да мужедаш ом вашке. А те мужедме нерген мом шонеда?
НАТАЛЬЯ.
Морко район.