29 июнь — 5 июль – тӱжвал (внешний) амаллан кӧра лийше колымашым иземдыме арня.
Тӱжвал манме амаллан кӧра таза йоча-шамыч колат. 2025 ийыште тыгай амаллан кӧра 2 йоча колен, тений 5 тылзыште – 2 икшыве. Чаманен каласыман, кеҥеж каникул годым ятыр ӱдыр-рвезе эмгана, тидыже йоча-шамычым колымаш мартеат шукта. Кеҥежым йоча-шамыч эмганыме случай-влак кок пачаш ешаралтыт. Тыге ынже лий манын, кеҥеж каныш годым профилактике мероприятий нерген шарныман. Тидын дене Марий Эл Республикысе Тазалык аралтыш министерствын Ава лийме да йоча пагытым аралыме пӧлкан начальникше Галина Мурзаева палдара.
Вӱд воктене каныме, дачыште але садыште улмо годым илыш лӱдыкшыдымылык правилым шуктыман.
Вӱд воктене
Йоча-влак кугыеҥ деч посна йӱштылаш пурышаш огытыл, тидлан лӱмын ойырымо верым ойырыман, тушто утарыше-влак бригаде дежуритлышаш. Йӱштылаш ок лий манын шижтарыше знак уло гын, тыгай верыште йӱштылман огыл. Правилым пудыртымо туткар марте шуктен кертеш. 2026 ийыште Марий Элыште ийготыш шудымо кок еҥ пуреҥгаен.
Окна гыч камвочмо
Ача-ава палышаш: йочалан лӱдыкшыдымӧ окна могай лийшаш, ньога тушеч ынже лектын воч манын, мом ыштыман. Статистике почеш, йоча-влакын окна гыч камвочмо случай-влак кокла гыч пелыже москитный сетке кушкедлымылан кӧра лиеш. Социально лӱдыкшӧ положенийыш логалше еш-шамычлан социальный службо-влаклан утларак тӱткышым ойырыман.
Ола воктенысе участкылаште да дачыште
Тусо корнылаштат корно правил нерген мондыман огыл. Электрический да бензоинструмент дене пайдаланыме годым воктене йоча уло гын, шекланыман. Кугу вольык воктене улмо годымат тӱткӧ лийза, ир янлыкынат лӱдыкшым конден кертмыжым шарныза.
Электросамокат дене
Тыгай транспорт дене лийше ДТП-лаште эмганыме случай-влак шукемыт. Автомобилист-влак самокат дене кудалыштше-шамычым шукыж годым тӱкат. Корно туткарыш логалше самокатчик-влак кокла гыч пелыже наре – 25 ияш марте еҥ-влак. Электросамокат дене кудалыштме годым тыглай корно правилым палаш да шукташ гын, корно туткар палынак шагалемеш ыле.
Авторын фотожо.