Кундемыштына «Вӱдыштӧ лӱдыкшӧ укелык» месячник 1 гыч 31 июль марте эртаралтеш. Ты жапыште Марий аварийно-утарыше службын пашаеҥже-шамыч, йӱштылмӧ верлашке, пляжышке лектын, каныше-влак дене профилактике сынан тӱрлӧ мероприятийым эртарат. Нуно палемдат, кеҥеж, шокшо кече, вӱд еҥ-шамычлан куаным кондышаш улыт. Садлан утарыше-влак калыкын канышыже лӱдыкшыдымын эртыже манын, чот тыршат.
Теве, Кокшайскысе аварийно-утарыше группын еҥже-шамыч Юл эҥер сер воктене каныше-влаклан вӱдыштӧ шкем кузе чын кучаш кӱлмӧ нерген ушештареныт.
Шарныман:
- йочам кугыеҥ-влак деч посна ида кодо;
- палыдыме да йӱштылаш келыштарыдыме верлашке ида пуро;
- шке вийым утыждене ит ончыкто.
Звениговысе аварийно-утарыше группын утарышыже-шамыч тазалыкым пеҥгыдемдыме «Кичиер» йоча лагерьыште лийыныт. Тушто нуно кушкын толшо тукымлан илышыште лийше случай-влакым лончыленыт, каҥашеныт. Икшыве-влаклан вӱд воктене шкем кузе чын кучыман, пуреҥгайышылан кузе полшыман каласкаленыт. Тыгак вӱдыштӧ тӱрлӧ модыш дене модмо чылаж годымак лӱдыкшыдымӧ огыл манын, ушештареныт.
Палемдыман, вӱдыштӧ шкем чын кучаш туныктымо месячник тыглай акций огыл. Тиде кугу системный пашалан шотлалтеш. Вет кажне еҥын илышыже верч ответственность эн ончылно лийшаш.