Март тӱҥалтыште эн ончыч парк ден чодыралаште шемгорак дене пырля вырляҥге чоҥештен толеш. Нунын почеш шочмо кундемышкышт шырчык ден турий пӧртылыт. Турий-шамыч ондак толыт гын, шошо ондакрак лиеш.
Варажым шошымсо кайыкын сылнысемжым мыланна пембе ден мурышо лого пӧлеклаш тӱҥалыт. Тӱҥ шотышто нуно иктаж 1-10 апрельыште толын шуыт.
Апрель кыдалне муным пӱкташ кайыкомбо, колшыре (чайка), турня, йӱштыгайык але чиегайык, тулгайык пӧртылыт.
А майыште шӱшпык йӱкым колыштын кертына. Тыгодымак кайык мурыш сылне семым вараксим, ӱжӱвӱр, сергайык ешарат.