Марий Элыште мланде участкым налаш черетыште шогышо СВО участник-влаклан мланде олмеш окса компенсацийым пуымо шотышто законым пеҥгыдемдыме.
300 тӱжем теҥгеаш выплатым кок тӱрлӧ категориян еҥ-влак налыт кертыт: Россий Герой званиян да Россий Федерацийын орденже дене палемдалтше СВО участник-шамыч, тыгак спецоперацийыште вуйым пыштыше-влакын ешышт, кӧмыт мланде участкым оксам тӱлыде налаш черетыште шогат.
Марий Эл Республикысе кугыжаныш пого министр Алексей Плотниковын мутшо почеш, кундемыштына 2026 ий январьысе данный дене келшышын, тыгай полышым налаш 254 еҥын праваже уло. Выплатым ик гана пуат. Тидлан айдеме йодмашым возышаш. Оксам кеч-могай сомыллан кучылташ лиеш.
Тиде полышым пуаш республикысе бюджет гыч 2027 ийлан 30 млн теҥгем ойыраш палемдыме. Эн ончыч ты выплатым 2024 ий 31 декабрь марте учётыш шогалше еҥ-шамычлан пуат. Нунын деч йодмашым 1 март гыч 30 июнь марте налыт.
Кугыжаныш Погынын кодшо сессийыштыже колышо СВО участник-влакын ешыштлан мланде участке шотышто черетын рашлыкше нергенат вес законым пеҥгыдемдыме. Эн ончычак тыгай права дене пелашыже ден йочаже-влак пайдаланен кертыт. Нунын уке улмышт годым права СВО участникын ача-аважлан кусна.
Законышто тыгак ешын членже-влак вес регионышто илыме случайымат ончыктымо. Тыгодым участкым налаш йодмашым Марий Элыште эре илыше родо-тукымжо пуышаш. А родо-влак республикысе тӱрлӧ районышто илат гын, ешысе еҥ-влак, кӧ йодмашым возышаш манын, шке кутырен келшат.
Тылеч посна законышто мландым ик категорий гыч весыш кусарыме жапым (республикысе Правительстве гыч Мингосимуществылан пуымо полномочийын срокшым) иземдыме.
Еҥ-влаклан коммунальный инфраструктурым ыштыдыме, тӱрлӧ сетьым йӧнештараш планироватлыме да кугыжаныш программыш пуртымо мланде участкыламат налаш йӧн уло. Тиде пунчал черетым шагалемдаш полшышаш.