Марий Элым Вуйлатыше Юрий Зайцев республикыште правопорядкым шуктымо шотышто координационный совещанийым эртарен.
Тушто закондымо миграцийым, тыгак йотэлласе граждан-влакын да гражданстве деч посна еҥ-влакын шолып пашам ыштымыштым чактарыме, РФ Кугыжаныш Думын IX созывышкыже депутат-влакым сайлымашым эртарыме да тудлан ямдылалтме годым лӱдыкшыдымылыкым да правопорядкым шуктымо теме-влакым тарватеныт.
Варажым деструктивный идеологийлан мелын лийше подростко-шамыч шотышто шижтарыме да профилактике мероприятийлам ямдылыме йодыш шотыштат каҥашеныт. Заседанийыште национальный да федеральный проект-влак почеш пашам шуктымо годым правам пудыртымым чарыме паша нерген ойленыт. Участник-влак республикысе бюджет гыч нине сферылан ойырымо оксам кучылтмым тергымашын лектышыжым ончен лектыныт.