19-21 августышто Йошкар-Олаште Калык-влак кокласе II молодёжный патриотический слёт эртаралтын.
Тушко Марий Элысе тӱрлӧ район да пошкудо регион гычат 200 наре самырык еҥ толын. Ты пайрем 19 калыкын шочшыжым: марийым, рушым, армяным, якутым, чувашым да молымат – ушен. Мероприятий Россий калык-влакын икоян улмо идалык кышкарыште эртаралтын да Россий флагын кечыжлан келыштаралтын.
– Тыште тӱрлӧ национальностян чолга ӱдыр-рвезе-влак Шочмо элым йӧратыме да тӱвыра аланыште кылым пеҥгыдемдыме шотышто йодыш-влак нерген каҥашаш чумыргеныт. Тыланда ончыкыжым калык-влак кокласе кылым вияҥдыме, элнан идеологийжылан келшыше поянлыкым: калык-влак келшымаш негызеш шочшо патриотизм шӱлышым – ончыко виктараш логалеш. Пырля веле ме элна ончылно шындыме да Президент Владимир Владимирович Путинын палемдыме цельыш шуын кертына. Калык-влак икоян улмо – сеҥымашлан ӱшан! – каласен Марий Элым Вуйлатыше Ю.Зайцев слётым почмо годым.
Слётым пайремлын почмо кечын «Диалог на равных» мероприятий эртаралтын. Участник-влакын ямдылыме йодышыштлан республикысе ончылъеҥ-шамыч вашештеныт: Марий Элым Вуйлатыше Ю.Зайцев, Кугыжаныш Погынын Председательже М.Васютин, Россий калык-влак ассамблейын генеральный директоржо А.Латыпов. Нуно пашашт нерген веле огыл, тӱрлӧ теме шотышто шке шонымышт, тӱняумылымашышт, илыш йӱлашт дене палдареныт.
Кокымшо кечын рӱдоласе 32-шо №-ан школ кумдыкышто ӱдыр-рвезе-шамыч тӱрлӧ калык модмаште шкеныштым тергеныт: городки дене, фиджитал-баскетболла модыныт, кугу портышкем да ече дене куржмаште таҥасеныт, «Гусеница» маналтше эстафетыште писылыкыштым ончыктеныт. А вара нуным «IQ-Россия» уш-акылым тергыме модмаш вучен – 10 командылан шелалтын, Россий калык-влакын историй ден тӱвыраштым палымаште таҥасеныт. Теве «Вау-квиз»-ыште кумдан палыме мультфильм, модмаш ден спортын видше-влакым палымаште шкеныштым тергеныт.
Кечывал деч вара гын чылан, шке калык вургемым чиен, школ деч Чарла кремль марте «Калык-влак келшымаш парад» таҥошкылмашке ушненыт. Туштыжо калык-влак кокласе «Под флагом единства» этнотӱвыра фестиваль годым шке калыкын тӱвыра поянлыкышт дене палдарыше усталык номер дене выступатленыт.
Пытартыш кечын слётын участникше-шамычым Йошкар-Ола дене лишкырак палымым ыштеныт: тошто да тӱвыра объект-влакым ончыктеныт да нунын историйышт нерген каласкаленыт, архитектур ойыртемышт дене палдареныт.
Молодёжный патриотический слёт ик шӱлыш дене эртаралтын. Ты мероприятий ӱдыр-рвезе-шамычлан элнан тӱрлӧ калыкшын тӱвыраж нерген утларак пален налаш веле огыл, тыгак умылаш полшен: ме тӱрлӧ улына гынат, ик ешын – кумда Российын – ужашыже улына. Тидыже калык-влак кокласе кылым утларак пеҥгыдемда да Шочмо элым йӧраташ да тудын верч кугешнаш эшеат тарата.
Кирилл Новосёлов, Шернур округ:
– Российысе калык-влак ассамблейын Марий Элысе отделенийжын еҥже улам. Садлан Самырык-влаклан патриотический слёт нерген ончылгочак паленам. Тушко ушнаш ассамблейын регионысо отделенийжын вуйлатышыже Лариса Николаевна Яковлева темлен.
Ты кум кечыште чылажат оҥай лийын, организатор-влак пеш поян программым ямдыленыт. Мыланем гын Чарла кремль марте таҥошкылмаш чоныштем поснак келге кышам коден да марий улмем дене эшеат кугешнаш таратен. Кремльыште эртаралтше этнофестивалят кужу жаплан шарнымашеш кодеш. Тӱрлӧ калык куштымаш, тӱвыра, историй нерген пален налаш оҥай ыле. Тыгай мероприятийын кӱлешлыкше моткоч кугу, вет нуно мемнам, марийым, рушым, татарым, чувашым да моло калыкын шочшыжым, иквереш чумырат, келшымаш кылым пеҥгыдемдат.
Эмилия Арутюнян, Йошкар-Ола:
– Анна шӱжарем дене когыньнам ты слётыш ушнаш Йошкар-Оласе армян диаспорын еҥже Асмик Москововна Оганесян ӱжын. Ты слётышто лиймым кугу пиаллан шотлем, вет тиде шке калык дене палдараш веле огыл, моло этносын тӱвыра илышыж нерген пален налаш да оҥай еҥ-влак дене палыме лияш йӧн.
Молодёжный патриотический слёт гай сынан мероприятий-влак Российын тӱрлӧ калыкше коклаште келшымаш кӱварым чоҥат да мемнам, илыш-йӱла ден историйна тӱрлӧ гынат, ик еш семын ушаш полшат. Кум кече жапыште калыкше нерген молыланат палдарыше, тудын дене кугешныше шкем гаяк ятыр ӱдыр-рвезе дене палыме лийынам. Национальный сымыктыш гимназийыште эртаралтше концерт поснак келшен. Тунам шкежат сценыш лектынам – кумдан палыме армян композитор Арно Бабаджанянын «Ноктюрн» произведенийжым саксофон дене шоктенам. Тыгодым чоныштем каласен мошташ лийдыме кумыл озаланен: кугешнымаш да кумда элнан ужашыже улмым шижмаш.