19-23 майыште Саратов областьысе Хвалынск олаште Юл кундем федеральный округын «Туриаде – 2026» спортивно-туристический лагерьже эрта. Тушко Марий Эл гыч 34 еҥ ушнен.
Командыш тыглай гына участник-влакым чумырен огытыл. Нуно Юл кундем федеральный округысо таҥасымашын сеҥышыже, призёржо улыт. Тыгак МарГУ-н да ПГТУ-н студентше, вуйлатыше, судья-влак ушненыт. Нуно йолын коштмаште, велосипед дене кудалыштмаште да иймаште вийыштым тергат. Тыгак авторский мурым йоҥгалтарымаште, тӱнямбал стартыште (Беларусь, Казахстан, Монголий да моло элла гыч толшо спортсмен-влак коклаште), «Калык-влак келшымаш кубок» верч таҥасат.
Ушештарена, ӱмашсе «Туриаде – 2025» таҥасымашыште Марий Элын командыже тӱшка зачётышто икымше лийын. Мероприятий «Спорт России» федеральный проект почеш эртаралтеш. Тудлан Россий Президентын Юл кундем федеральный округысо полномочный представительже Игорь Комаров шкеак вуйын шога. Туриаде самырык-шамычым таза илыш-йӱлам кучаш, спорт да туризм дене патриотизм шӱлышым пеҥгыдемдаш келыштаралтын.