Кугыжаныш полышлан кӧра Марий Элысе ял ден селалаште врач-влак 13,3 процентлан ешаралтыныт. Тыге палемденыт кодшо кечылаште Марий Эл Правительствыште Марий Элым Вуйлатыше Юрий Зайцевын эртарыме заседанийыште.
– Ме врач ден медицине пашаеҥ-влаклан социальный полышым пуышаш улына, системыште специалист-влакым кодаш гына огыл, тыгак медицине вузласе выпускник-влакым мемнан республикыште пашам ышташ кумылаҥдышашлан, – каласен Юрий Зайцев.
Тазалык аралтыш министр Владимир Гладневын мутшо почеш, тӱрлӧ мерым илышыш шыҥдарымылан поснак районлаште илыше калыклан медицине полышым пуаш йӧн шукырак лийын.
Регионысо программе почеш илыме верым саемдаш кум млн теҥгеаш выплате ик гана пуалтеш. 2024-2025 ийлаште тиддене 14 врач пайдаланен. Тений эше 10 врачлан пуаш палемдыме. Сай ошкыл уло гынат, кадровый йодыш пӱсынак шога.
Специалист-влак ситыдымашым кораҥдаш ятыр йӧным палемдыме: профориентационный паша, целевой тунеммаш, врач-стажёр-влакым пашаш налмаш, вес кундемла гыч специалист-шамычым ӱжмаш, наставничествым вияҥдымаш – чыла тидлан кумылаҥдыше выплатым пеҥгыдемдыме.
2026 ийыште «Медицинские кадры» федеральный проект дене келшышын, Йошкар-Оласе медицине колледжыште Региональный кадровый рӱдерым сентябрьыште почаш палемдыме. Тушто здравоохранений сферысе персонал-влакым виктарыме сомылым шукташ тӱҥалыт.