Марий Эл Правительстве ден «Защитники Отечества» фондын регионысо филиалже спецоперацийысе ветеран-влаклан медицине полышым пуымо шотышто посна системым келыштареныт.
Фондын пӧлкашкыже пашам ышташ тӱҥалме жап гыч кызыт марте 3500 утла йодыш пурен.
Элым аралыше-влакын тазалыкыштым пеҥгыдемдымаште санаторийыште эмлалтмаш да канымаш кугу верым налыт. Марий Элым Вуйлатыше Юрий Зайцевын инициативыж почеш 2023 ий годсек СВО ветеран ден ешыштлан эмлалташ да канаш бюджет гыч окса ойыралтеш. А тидлан йӧн «Сосновый бор» ден «Кичиер» санаторийлаште ышталтеш.
Чылаже 2023 ий гыч таче марте республикыштына санаторно-курортный эмлымашым 236 боец эртен, икмынярынже шке ешышт дене пырля.