1 апрель гыч Евразийский экономический союзыш (ЕАЭС) пурышо элла гыч автомобиль-влакым ужалаш кондымо радам вашталтеш.
Ты жап гыч элыштына сатум вучымо шотышто пеҥгыдемдыме национальный системе (СПОТ) тестовый режимыште пашам ышташ тӱҥалеш. Кызытеш лачак автомобиль шотышто гына. Вес тӱрлӧ транспортым Россий Правительствын пунчалже дене 2027 ий деч ончыч огыл СПОТ-ыш пуртат. А тений 1 июль гыч импортёр-влак Россий ФНС гоч поставке нерген системе гоч палдарышаш да оксам тӱлышаш улыт. Перевозчик-влак поставке шотышто QR-кодан документым налыт да таможньышто тудым ончыктат. Тидым налогым тӱлыдымӧ-влак ваштареш кучедалме йӧнлан шонен лукмо.