Морко районын шочшыжо Виктория Петрова дене тений Йошкар-Олаште Российысе калык-влакын икоян улмо идалыкыштым пайремлын почмо годым палыме лийым. Мотор чурийвылышан да вургеман марий ӱдыр Унчо ялын шочшыжо улам, мане.
Тудо Унчо кыдалаш школышто 11 ий шинчымашым погымеке, Марий кугыжаныш университетыш марий йылме, литератур да англичан йылме туныктышылан тунемаш пурен. Кызыт кокымшо курсым тунем пытарен. Шочмо йылме шӱм-чонжылан ондакак лишыл лийын. Школ пагытыште тӱрлӧ олимпиадыш, утларакшым марий йылме, литератур, руш йылме дене, коштын.
Виктория Ккзыт могай кумыл дене тунеммыж нерген каласкалыш:
– Студент жап – эн шерге да йоҥгыдо жап. Тиде пагыт веселан эрта. Молан манаш гын, ме, студент-влак, пеш активный улына. Икымше да кокымшо курсышто тунемме годым «Марий мурсем» ансамбльыш кушташ коштынам. Тушто, тӱрлӧ районысо куштымашым, муро-влакым тунемын, концертлашке ушнымо. Коллективыште весела, куштылго, сандене репетиций кузе эртен кайымым шижынат от шукто. Тыгак университетысе тӱрлӧ мероприятийыш ушнена, волонтёр семынат полшена.
Тиде кеҥежлан Йошкар-Олаштак кодынам. Марий кугыжаныш университетын приёмный комиссийыштыже абитуриент-влакын документыштым приниматлаш полшем.
Ялыш каныш кечылан миен коштам. Мутат уке, тунемме годым шочмо суртет, лишыл еҥет-влак верч йокрокланет. Студентын илышыже керек-мыняр событийлан поян гынат, садак чон ялышке шупшеш. Вет тушто – сылне пӱртӱс, яндар юж, шочмо вер. Йӧратыме пагытем – шошо. Тунам пӱртӱс ылыжеш, вий-куат утларак лектеш, кумыл нӧлталтеш. Кеч шошо мучашлан экзамен, зачёт-влак тӱҥалыт, тиде шотышто огына тургыжлане.
Вузышто тунемме жапыште тӱрлӧ еҥым вашлият. Мый поро чонан, весела кумылан еҥ-влак дене кылым кучаш тыршем. Пелен лач тыгаяк еҥ-влак улыт. Ме икте-весылан эре полшаш ямде улына. Студент пагыт айдемын вийжым тергыме, шонымашыжым келгемдыме жап. Студент илыш тӱҥ шотышто икте-весым умылаш, келшен илаш да пашам тӱшкаште ышташ туныкта.
Туныктышо лийнем але уке, кызытеш ом пале. Но тунемаш мыланем келша. Яра жапыште книгам лудаш тыршем, утларак – художественный литературым, марлат, рушлат.
В.Петрова вузым тунем пытарыме нерген шона да кугу тӱткышым, жапым шинчымашлан ойыра.
Подпись фото: Унчо вел ӱдыр.
Авторын фотожо.