14 июньышто Блогер-влакын тӱнямбал кечышт палемдалтеш.
Куандара, блогер-влак коклаште марий-шамычат улыт. Шукынжо марий вургем, кочкыш, муро нерген блогым вӱдат гын, М.Иванова «Мария про Марий Эл» тӱшкаштыже республикнан ойыртемалтше верлаже, рӱдолаже нерген каласкала.
Шочмо верым йӧраташ
Мария – опытан гид-экскурсовод. Тудо шочмо кундемнан ожнысо ден тачысе илышыжым шымла. Тидлан кундемнан тӱрлӧ ялышкыже лектын коштеш. Тылеч посна республикнан рӱдолаштыже верланыше оҥай да ойыртемалтше верла дене палымым ышта. Кугу тӱткышым калык йӱлалан, кочкышлан, сомыллан ойыра.
– Такшым соцкылласе лаштыклаштем ынде ятыр ий чолгалыкым ончыкташ тыршем. Ты пашам вияҥдаш тӱҥалмем годым тӱҥ направленийым шканем палемден омыл, мом шоненам – тудым ончыктенам. Пытартыш ийлаште туризм тематикым кумдаҥдымылан вуйын шогем. Тидлан Йошкар-Оланан палыме да палыдыме, кундемнан мотор верлажым сниматлем да подписчик-шамычым палдарем. Тыгак калыкнан поян тӱвыражым ончыкташ тыршем. Нине направлений-шамыч мыланем шканемат оҥай улыт, мый нуным утларак пален налнем да тидын дене шке шинчымашем пойдарынем. А соцкыллаште, тыгай сынан савыктыш-влакым вераҥден, мыйым ончышо да колыштшо-влаклан кеч изиш да пайдам кондымемлан ӱшанем. Тыге нуно шке шочмо кундемыштым, калыкыштым утларак йӧраташ да пагалаш кумылаҥыт, шонем, – каласкала Мария.
Савыктыш кумылым савырышаш
Мария Иванован вӱдымӧ блогшын – шке почеркше. Кажне фотоштыжо да видеоштыжо чоным пыштен ыштыме паша шижалтеш. Ӱдыр тӱрлӧ татын моторлыкшым ужын да тудым войзен моштымыж денат ойыртемалтеш.
– Постым, заметкым ямдылыме годым шкежат шуко ум пален налам. Кажне савыктышыште кундемнан историйже дене кылдалтше фактым ончыкташ, мотор фотом вераҥдаш да тудым сылнын сӧрастараш тыршем. Тыге ыштен, шкем веле огыл, тыгак мыйым ончышо да лудшо-шамычын кумылыштым нӧлташ тыршем.
Текстымат уш-акылым пойдараш полшышым возем, тыгодым раш да кӱчыкын умылтарем. Тыште илыше-шамычлан шке кундемышт нерген утларак палдарем гын, турист-шамычым Марий Элыш толын каяш тидын дене сымыстарем, – радамла блогер.
Посна рубрике дене «Мария про Марий Эл» тӱшкаште ӱдыр республикысе ял, посёлко, села-влак нерген каласкала. Тыгай материал-влак утларакшым видеоклипыш войзалтыт. Мариян ойлымыж почеш, видеоклипыште вершӧрын чыла гаяк моторлыкшым подписчик-шамычлан ончыкташ йӧнан.
Блогер «Азбука Йошкар-Олы» проектлан ик жап вуйын шоген. Ончыкыжым тыгаяк сынан «Марий Эл Республикын Азбукыжо» проектым илышыш шыҥдараш шона.
– Ты паша дене тачат йӱлем. Ончыкыжым тудым илышыш пуртем манын ӱшанем. Азбукысо буква-влакын радамышт почеш, рӱдолаштына ты але тудо буква гыч тӱҥалше достопримечательность-шамыч нерген каласкаленам. Ынде пӱтынь республикнан ойыртемалтше верлаже-влак дене Азбукысо буква-влак почеш материалым блогыштем савыкташ шонем. Тылеч посна марий калыкемын моло шӧрынжымат авалташ тыршем. Мутлан, рецептым, вургемым да молымат ончыктем, – манеш Иванова.
Ончышо да колыштшо еҥын кумылжым блогер-влаклан савыраш куштылгыжак огыл. Но чоным пыштен вӱдымӧ блог, чынжымак, шкеж деке савыра. Садлан тыгай еҥ-шамыч лишыл жапыште шке лаштыкыштышт могай оҥай, ойыртемалтше постым луктыт – вучет. Мария Иванован вӱдымӧ «Мария про Марий Эл» тӱшкаже лач тыгай. Садлан ӱдырын умбакыжат кундемнан сылне пӱртӱсшӧ, ойыртемалтше илышыже да мотор верлаже нерген пост-влак эше ятыр лийыт манын ӱшанена да эскерена!